Grupet protestuese dhe sindikatat në Francë u kanë bërë thirrje të dielën qytetarëve të marrin pjesë në demonstrata të tjera, në përpjekje për të mbajtur presionin ndaj qeverisë, pasi një operacion i gjerë i sigurisë ndihmoi në frenimin e trazirave gjatë protestave mbarëkombëtare të së shtunës.
Ministria e Brendshme ka bërë të ditur se 410 mijë persona kanë marrë pjesë në marshimet e së shtunës, ndërsa autoritetet angazhuan 70 mijë policë, duke ndihmuar në parandalimin e përsëritjes së grabitjeve dhe akteve të vandalizmit që përfshinë shumë qytete më 17 tetor.
Drejtuesit e sindikatave u bënë thirrje qytetarëve të protestojnë sërish të shtunën e ardhshme dhe të marrin pjesë në një grevë mbarëkombëtare më 5 nëntor, duke thënë se pakënaqësia për pagat, koston e jetesës dhe shërbimet publike po përhapej përtej lëvizjes studentore, e cila nisi mobilizimin muajin e kaluar.
Sindikatat e arsimit SUD Education kanë njoftuar se do t’i bashkohen demonstratës së 31 tetorit, ndërsa sindikata e madhe CGT ka thënë se do ta marrë vendimin gjatë javës.
Edhe Lëvizja e Jelekëve të Verdhë, një lëvizje qytetare që u shfaq në vitin 2018 si reagim ndaj taksave mbi karburantet, ka bërë thirrje për tubime masive të shtunën e ardhshme.