Policia gjermane ka arrestuar të martën një të dyshuar në lidhje me një seri sulmesh ndaj sistemeve të shpërndarjes së energjisë elektrike në Gjermani, të cilat kanë shkaktuar një kërkim masiv që ka zgjatur për disa ditë.
Një 48-vjeçar është arrestuar pranë një termocentrali në Weisweiler, në landin perëndimor të Nordrhein-Westfalenit.
Burri, emri dhe shtetësia e të cilit nuk janë bërë të ditura, në përputhje me rregullat gjermane për mbrojtjen e privatësisë, por që mediat lokale e kanë identifikuar gjerësisht si Daniel V., kishte në posedim lëndë shpërthyese dhe nuk ka bërë rezistencë në momentin e arrestimit, ka njoftuar policia e Këlnit në një deklaratë.
Kur aktet e para të sabotimit ndodhën në fillim të javës së kaluar në një nënstacion pranë termocentralit me qymyr në Jänschwalde, në verilindje të Gjermanisë, dhe disa orë më vonë një qark i shkurtër nxori jashtë funksionit linjat e energjisë në nënstacionin elektrik të Bergheimit, pranë Këlnit, zyrtarët e lartë të sigurisë në të dy landet ngritën alarmin dhe thanë se nuk mund të përjashtonin mundësinë që sulmet të ishin kryer nga fuqi të huaja.
Incidentet ndodhën në një kohë kur vendi ishte në gatishmëri të lartë, pasi qeveria kishte akuzuar Rusinë për një përpjekje sulmi në aeroportin Leipzig/Halle më 4 gusht, duke përdorur një dron të ngarkuar me eksplozivë.
Megjithatë, ministri i Brendshëm gjerman, Alexander Dobrindt, ka thënë të premten se besohej se aktet ishin kryer nga një aktivist i vetëm, në kuadër të ekstremizmit klimatik.
Përveç sulmeve të para të sabotimit pranë Jänschwalde dhe Bergheimit, burri dyshohet se ka tentuar, në disa lokacione në Nordrhein-Westfalen dhe në landet lindore të Brandenburgut dhe Saksonisë, të përdorte raketa të prodhuara vetë për të hedhur një tel të hollë përtej linjave të tensionit të lartë, duke shkaktuar kështu një qark të shkurtër.
Policia ka thënë se të martën oficerët ndodheshin në Weisweiler për të siguruar provat dhe për të kontrolluar nëse në zonën përreth ishin vendosur pajisje të tjera shpërthyese, të cilat ende nuk ishin zbuluar.