Bullgarët po votojnë të dielën për të zgjedhur presidentin e ardhshëm, pas një fushate të dominuar nga rritja e çmimeve, vështirësitë ekonomike dhe shqetësimet e sigurisë lidhur me luftën e Rusisë në Ukrainë dhe sulmet me dronë në Detin e Zi.
Zgjedhjet përbëjnë një test të rëndësishëm për partinë “Bullgaria Progresive” të kryeministrit Rumen Radev, e cila ka fituar zgjedhjet parlamentare në prill.
Presidentja Iliana Yotova, e mbështetur nga partia e Radevit, është ndër kandidatët kryesorë në një garë me gjithsej 27 kandidatë. Pritet që në rundin e dytë të kalojë edhe Andrey Gyurov, ish-kryeministër në detyrë, i mbështetur nga partitë opozitare pro-perëndimore.
Fushata është përqendruar kryesisht te pushtimi i Ukrainës nga Rusia dhe përshkallëzimi i armiqësive në Detin e Zi, ku sulmet e fundit me dronë ndaj anijeve tregtare pranë brigjeve të Bullgarisë kanë shtuar shqetësimet për sigurinë. Rritja e çmimeve të energjisë dhe inflacioni kanë rënduar gjithashtu buxhetet familjare, veçanërisht në zonat rurale.
Pas sulmeve, qeveria ka kërkuar ndihmë nga partnerët ndërkombëtarë për të forcuar sigurinë detare.
Votimi pasqyron gjithashtu ndasitë lidhur me pushtimin e Ukrainës nga Rusia dhe marrëdhëniet e Bullgarisë me Moskën dhe aleatët e saj perëndimorë.
Sondazhet e para pas mbylljes së votimit në ora 20:00 pritet të publikohen menjëherë, ndërsa rezultatet paraprake pritet të bëhen të ditura të hënën.
Asnjë kandidat nuk pritet të fitojë shumicën absolute në rundin e parë. Pjesëmarrja në votime parashikohet të mbetej nën 40 për qind, çka mund të çojë në një rund të dytë më 1 nëntor.
Presidenti i Bullgarisë zgjidhet për një mandat pesëvjeçar. Megjithëse posti është kryesisht ceremonial, presidenti ka kompetenca që përfshijnë komandimin e forcave të armatosura dhe vënien e vetos ndaj legjislacionit.