Deputetja e Lëvizjes Vetëvendosje, Arbërie Nagavci, ka thënë se tërheqja e profesor Bekim Sejdiut nga kandidatura për president të Kosovës është humbje.
Nagavci ka shprehur mirënjohje për Sejdiun që ka treguar gatishmërinë për t’u kandiduar për president.
Sejdiu ishte propozuar si president konsensual në marrëveshjen e dakorduar mes Lëvizjes Vetëvendosje dhe Lidhjes Demokratike të Kosovës, dy javë më parë. Por, ai sot ka njoftuar se është tërhequr nga gara.
Kundër Sejdiut ishin deklaruar gjashtë nga 18 deputetët e LDK-së. Kujtim Shala, Avdullah Hoti, Hykmete Bajrami, Arben Gashi, Armend Zemaj dhe Janina Ymeri deklaruan se nuk do ta votojnë Sejdiun.
Nagavci ka thënë se po krijohet një klimë politike që po demotivon personalitete që të vënë dijen e përvojën në shërbim të shtetit.
“Tërheqja e prof. dr. Bekim Sejdiut nga gara për President të Republikës është humbje për një proces që do të duhej të sillte në vëmendje personalitete me integritet, profesionalizëm dhe kredibilitet. Fatkeqësisht, në vend që të krijojmë hapësirë për personalitete të tilla që të vënë dijen dhe përvojën e tyre në shërbim të shtetit, po krijohet një klimë politike që i demotivon ata. Përpjekja për ta çuar vendin me lehtësi drejt zgjedhjeve të reja po na dërgon nga një bllokadë në tjetrën, duke e bërë gjithnjë e më të vështirë ndërtimin e një konsensusi që i duhet vendit. Kosova nuk ka nevojë për bllokada të reja. Ka nevojë për përgjegjësi, stabilitet institucional dhe gatishmëri për të gjetur zgjidhje. Prof. Sejdiut i shpreh respekt dhe mirënjohje për gatishmërinë që, me integritetin dhe profesionalizmin e tij, t’i shërbejë Republikës”, ka shkruar Nagavci në Facebook.
