Behrami: EU reactions to Kurti – as a coordinated game between them

Deputeti i zgjedhur i Partisë Demokratike të Kosovës, Artan Behrami, ka thënë se reagimet e Bashkimit Evropian ndaj veprimeve të Qeverisë Kurti “duken si lojë e koordinuar mes tyre”.

BE-ja së fundmi ka bërë tri reagime ndaj veprimeve të autoriteteve të Kosovës. Ajo ka shprehur keqardhje për refuzimin për kthim të serbëve të dorëhequr nga institucionet e drejtësisë, por edhe ka kërkuar ndaljen e rrënimeve të vilave në Ujman. Sipas Behramit, BE-ja në raste të caktuara i lejon Kurtit të shfaqë edhe nacionalizëm.

“Është më shumë qëndrim personal i imi. Çka kam parë unë është se këto reagimet e BE-së në raport me zotin Kurtin, mua më duken si lojë e koordinuar mes tyre. Me bë pak zhurmë... si te shohin që Kurti është keq me matjet e opinionit publik e lejojnë të bëhet më nacionalist edhe kundër serbëve e edhe kundër Serbisë, ndërsa pas tyre gjithmonë vijon ndonjë kompromis i tmerrshëm për Kosovën. Kosovës iu hoqën masat, përfundimisht edhe atë para zgjedhjeve. Dhe zoti Kurti i shpërbleu me Ligjin për shtetësi, që është ligj skandaloz dhe ndërsa flasim ne sot këtu, në konsullata të Kosovës nëpër botë ka plot serbë të të ’70-ave, ’80-ave e ’90-ave që aplikojnë për shtetësi të Kosovës. Kurti gjithmonë sa herë te shihni që është nacionalist, që i godet serbët lokalë dhe Serbinë e Vuçiqin e Radoiçiqin pritni në ditët dhe javët e ardhshme ndonjë kompromis të tmerrshëm për Kosovën”, ka thënë Behrami në Interaktiv të KTV-së.

Ai ka thënë se “BE-ja duhet të jetë më shumë e shqetësuar për tendencat e Kurtit për përmbysje të rendit kushtetues, kapje të institucioneve”.

Behrami ka akuzuar BE-në për operim me dy standarde në krahasim me veprimet e Qeverisë Kurti dhe të ish-qeverive.

“Të jenë të paktën 30 për qind më të zëshëm se kundër qeverive të kaluara... Po operon me dy standarde. Dikur kishte standard, kur unë isha në Qeveri, ata shikonin çdo deklaratë të çdo zyrtari tepër të ulët e reagonin. Atë kohë ka ushqyer e ka përhapur stereotipe për qeveritë kur kam qenë në pushtet. Dhe i njëjti Bashkim Evropian ka investuar në Vuçiqin... 10 miliardë euro qarkullim të firmave gjermane... Dhe në atë kohë, Kosova portretizohej si epiqendër e korrupsionit dhe krimit të organizuar në Evropë e shpërblehej Vuçiqi që është dëshmuar si kriminel dhe autokrat e i involvuar në krime të llojllojshme”, ka shtuar ai.