Bashkimi Evropian ka nisur një hetim ndaj platformës së rezervimeve të udhëtimeve Booking.com, për shkak të shqetësimeve se kompania nuk po bën mjaftueshëm për të parandaluar listimet e rreme të akomodimeve dhe mashtrimet përmes mesazheve elektronike (phishing), raportoi të mërkurën Euronews.
Autoritetet evropiane dyshojnë se platforma ka nënvlerësuar ndikimin e mashtrimeve dhe të akomodimeve të palicencuara, si dhe nuk ka ndërmarrë masa të mjaftueshme për të parandaluar keqpërdorimin e të dhënave personale të përdoruesve nga mashtruesit.
“Qytetarët evropianë duhet të jenë në gjendje t’i rezervojnë pushimet e tyre pa frikën se do të mashtrohen”, ka deklaruar shefja e BE-së për çështjet digjitale, Henna Virkkunen.
Hetimi synon të përcaktojë nëse Booking.com i ka përmbushur detyrimet që dalin nga Akti për Shërbimet Digjitale (DSA), legjislacioni i Bashkimit Evropian që përcakton përgjegjësitë e platformave online për mbrojtjen e përdoruesve.
Përveç mashtrimeve dhe listimeve të dyshimta, Komisioni Evropian po shqyrton edhe nëse Booking.com ka shkelur rregullat për transparencën e reklamave.
Konkretisht, autoritetet po hetojnë nëse platforma ka dështuar t’i identifikojë qartë si reklama ato listime, ofruesit e të cilave kanë paguar për të zënë pozita më të larta në rezultatet e kërkimit.
Ky është hetimi i parë ndaj Booking.com në kuadër të Aktit për Shërbimet Digjitale.
Sipas Virkkunenit, kjo rregullore përcakton përgjegjësi të qarta për platformat online, ndërsa autoritetet evropiane duhet të sigurohen që platforma kryesore e rezervimeve të akomodimeve në Evropë t’i marrë ato seriozisht.
Booking.com ka reaguar duke thënë se po bashkëpunon plotësisht me hetimin e Komisionit Evropian.
Kompania ka theksuar se siguria, besimi i përdoruesve dhe mbrojtja e të dhënave personale janë ndër prioritetet kryesore të saj.
“Ne mbetemi të përkushtuar të bashkëpunojmë me qeveritë përkatëse, rregullatorët, organet e zbatimit të ligjit dhe partnerët e industrisë për të luftuar krimin kibernetik dhe mashtrimet online, si dhe për të mbrojtur udhëtarët dhe partnerët tanë”, thuhet në reagimin e kompanisë.
Sipas rregullave të Aktit për Shërbimet Digjitale, nëse konstatohen shkelje, Booking.com mund të përballet me gjoba deri në gjashtë për qind të qarkullimit të saj vjetor global.
Komisioni Evropian nuk ka përcaktuar një afat të caktuar për përfundimin e hetimit. Megjithatë, Booking.com ka mundësi t’i propozojë masa për adresimin e shqetësimeve të ngritura nga autoritetet evropiane.