Elena Rybakina tregoi pse është tenistja më e mirë në botë, duke mposhtur Aryna Sabalenkan për titullin e parë në US Open.
Rybakina, që garon për Kazakistanin, e dinte tashmë se do të bëhej numri një në botë pas finales të së shtunës mbrëma. Dhe e festoi këtë me fitore 2:1 në sete ndaj lojtares vendin e së cilës e zuri në krye të renditjes.
Rybakina fitoi me 6:4, 5:7 dhe 6:2 në sete.
Për të është titulli i tretë në garat e nivelit Grand Slam. Triumfoi në Wimbledon në vitin 2022 dhe në Australian Open në fillim të këtij viti.
Sabalenka, që është nga Bjellorusia, e kërkonte titullin e tretë rresht në US Open. Por ishte nën presion gjatë gjithë meçit. Rybakina dhe Sabalenka kanë krijuar rivalitet të fortë, të bazuar jo vetëm te talenti i tyre i jashtëzakonshëm, por edhe te personalitetet krejtësisht të ndryshme.
Gjakftohtësia e jashtëzakonshme e Rybakinës, në kontrast të plot me natyrën shpërthyese të bjelloruses, bëri diferencën kryesore në finale.