-
Μετάφραση: Vita Abrashi-Kajtazi
- 3 Σεπτεμβρίου 2026 09:50
- Μοιράστε σε:
Ylli i mirënjohur televiziv, Victoria Beckham, ka arritur një prej objektivave më të vështirë të karrierës së saj: biznesi i saj i modës dhe produkteve të bukurisë më në fund është bërë fitimprurës.
Kompania “Victoria Beckham Holdings” ka raportuar për vitin 2025 një fitim operativ prej 7.3 milionë funtesh britanike, ndërsa të ardhurat u rritën me 15 për qind, duke arritur në 129.8 milionë funte, ka shkruar BBC.
Për kompaninë, ky është një “moment historik”, ndërsa rritja ka vazhduar edhe gjatë këtij viti.
Rruga e gjatë: Nga humbjet e mëdha te fitimi
Victoria Beckham ka punuar për 18 vjet për ta kthyer kompaninë e saj në një biznes fitimprurës.
Në një dokumentar të Netflixit, ajo ka rrëfyer se biznesi dikur kishte humbje prej qindra-milionë funtesh, ndërsa shpenzimet ishin jashtëzakonisht të larta. Vetëm për lulet, kompania shpenzonte rreth 70 mijë funte në vit.
“Ka qenë një rrugëtim i tmerrshëm. Për pak humba gjithçka dhe ajo ishte një periudhë shumë, shumë e errët. Qaja para se të shkoja në punë çdo ditë, sepse ndihesha sikur po shuaja zjarre gjithë kohën”, ka treguar Beckham.
Në vitin 2017, investitori David Belhassen u përfshi në biznes dhe kërkoi ndryshime të mëdha.
“Duhet të ndryshojmë gjithçka, ta ristrukturojmë biznesin dhe kjo do të jetë e dhimbshme”, i kishte thënë ai.
Produktet kozmetike u bënë pjesë kyç e suksesit
Fillimisht e fokusuar te veshjet luksoze, këpucët dhe çantat, marka u zgjerua edhe në industrinë e bukurisë.
Në vitin 2019, Beckham lansoi “Victoria Beckham Beauty”, e cila sot mendohet se gjeneron rreth dy të tretat e të ardhurave totale të brendit.
Produktet kozmetike janë veçanërisht të rëndësishme për markat luksoze, pasi zakonisht kanë marzhe më të larta fitimi dhe janë më të përballueshme për një numër më të madh konsumatorësh.
Sipas Beckham, ajo vetë teston produktet dhe shpesh krijon artikuj që do të dëshironte t’i kishte në çantën e saj të kozmetikës.
Strategjia duket se ka funksionuar, pasi kompania pretendon se shet një laps për sy “Satin Kajal” çdo 30 sekonda.
Ndërsa në qershor, produkti “Foundation Drops” kishte një listë pritjeje me rreth 20 mijë persona.
Victoria Beckham u bë pjesë e brendit
Një tjetër faktor i rëndësishëm ka qenë ndryshimi i mënyrës se si Beckham prezantohet para publikut.
Nga figura e rezervuar që dikur njihej si “Posh Spice”, ajo është bërë më e hapur dhe më personale në rrjetet sociale. Shpesh publikon video duke përdorur produktet e saj të bukurisë, madje edhe me flokë të lagur, të filmuara në ambientet e shtëpisë.
Ekspertja e strategjisë së biznesit Lisa Maynard-Atem ka thënë se kjo e ka ndihmuar brendin të krijojë një lidhje më të fortë me konsumatorët.
“Ajo nuk ka hequr dorë nga eleganca dhe aspirata që pret nga një brend luksoz, por ka shtuar personalitetin. Kjo krijon lidhje dhe njerëzit blejnë nga brendet jo vetëm për arsye komerciale, por edhe emocionale”, ka thënë ajo.
Sipas saj, edhe fakti që Beckham ka folur hapur për vështirësitë financiare e ka bërë suksesin e saj më të besueshëm.
“Dështimi nuk është fshirë nga historia. Ai është bërë pjesë e historisë”, u shpreh Maynard-Atem.
A do të vazhdojë suksesi?
Pavarësisht rezultateve të mira, industria e modës mbetet shumë konkurruese dhe një vit fitimprurës nuk garanton sukses të përhershëm.
Ekspertja Stacia Bedford ka theksuar se çelësi është inovacioni i vazhdueshëm.
“Moda nuk është një industri e lehtë për t’u futur dhe sigurisht nuk është për njerëzit që dorëzohen lehtë. Themeluesit që zgjasin janë ata që i shohin pengesat si informacion për të mësuar dhe më pas ndërtojnë mbi to, në vend që t’i fshehin”, ka thënë ajo.