Këngëtarja 36-vjeçare Taylor Swift iu rikthye rrënjëve të saj në muzikën country në fillim të këtij viti për të shkruar këngën “I Knew It, I Knew You”, pjesë e filmit “Toy Story 5”. Ajo ka treguar se disa vargje të këngës mund të interpretohen në më shumë se një mënyrë, pasi synonte të përmblidhte të gjithë historinë e filmit brenda një kënge.
Duke folur në American Country Countdown, Swift tha se është e kënaqur që fansat po analizojnë tekstin dhe zbuloi kuptimet e dyfishta në disa vargje. Ajo shpjegoi se fjala “daze” në vargun për kujtimet e fëmijërisë mund të perceptohet edhe si “days”, duke iu referuar ditëve të fëmijërisë. Ndërsa përmendja e fijeve të barit në verë lidhet me kujtimet e fëmijërisë, lojën dhe imagjinatën, por edhe me faktin se personazhet janë lodra dhe mund të shohin vetëm deri në lartësinë e barit.
Swift shpjegoi gjithashtu vargun “Parachutes for the free fall of being younger”, duke thënë se ai i referohet si lodrave me parashutë që shfaqen në universin e “Toy Story”, ashtu edhe në mënyrë simbolike njerëzve që na ndihmojnë të rritemi dhe i bëjnë më të lehta “uljet” tona gjatë jetës.
Këngëtarja tha se është shumë krenare për mënyrën se si përdor detajet në tekstet e saj, por theksoi se ato nuk vendosen thjesht për të qenë përshkruese. Sipas saj, çdo detaj duhet të ketë një funksion në histori ose të tregojë gjendjen emocionale dhe mendore të narratorit. “Detajet vetëm për hir të fjalëve përshkruese nuk janë gjëja ime”, tha ajo, duke shtuar se i pëlqen detaji kur ndihmon në përcjelljen e emocioneve njerëzore.
Në intervistë, Swift foli edhe për një nga mësimet më të mëdha që ka mësuar gjatë viteve në shkrimin e këngëve: rëndësia e humorit dhe energjisë gjatë një seance krijuese. Ajo tha se qëndrimi dhe energjia me të cilat dikush hyn në një dhomë ndikojnë në të gjithë procesin, ndërsa mungesa e entuziazmit mund të ndikojë edhe te artistët, autorët dhe inxhinierët e tjerë dhe madje ta bëjë të pamundur krijimin e diçkaje atë ditë.