-
Μετάφραση: Vita Abrashi-Kajtazi
- 7 Σεπτεμβρίου 2026 12:30
- Μοιράστε σε:
Aktorja fituese e çmimit “Oscar”, Susan Sarandon, ka deklaruar se vazhdon të humbasë role në filma për shkak të qëndrimit të saj publik në mbështetje të palestinezëve, ka shkruar Ο κηδεμόνας.
Duke folur në Festivalin e Filmit në Venecia, ku po prezanton filmin e saj të ri “The Echo Chamber”, 79-vjeçarja ka thënë se një pjesë e industrisë së filmit ende e shmang për shkak të aktivizmit të saj.
“Kohët e fundit kam humbur sërish role, sepse disa agjenci po u thonë njerëzve që të mos më punësojnë. Por kjo është mënyra se si funksionon pushteti. Ndër njerëzit, sidomos në nivel ndërkombëtar, ndihem e mirëpritur”, ka thënë ajo.
Sarandon ka thënë se mendimi publik për konfliktin Izrael-Palestinë ka ndryshuar ndjeshëm që nga fillimi i luftës në Gaza në vitin 2023.
“Mendoj se narrativa ka ndryshuar plotësisht sa i përket rëndësisë historike të Palestinës dhe lidhjeve të sionizmit me Amerikën dhe politikën tonë. Për shumë njerëz ka qenë një zbulim i madh të kuptojnë se sa shumë para i jep SHBA-ja Izraelit”, ka thënë ajo.
Aktorja ka thënë se pasojat profesionale janë të forta sidomos kur bëhet fjalë për studiot e mëdha.
“Nëse bëhet fjalë për një studio të madhe, mendoj se nuk është vetëm me mua. Edhe njerëz të tjerë janë paralajmëruar se është e pamundur të punësohen për shkak të qëndrimeve të tyre”, ka thënë ajo.
Sarandon u shkëput nga agjencia e saj e vjetër e talenteve, UTA, në vitin 2023, pas disa deklaratave që bëri në tubime pro-palestineze.
Pavarësisht kësaj, aktorja ka thënë se ndihet e mbështetur nga njerëzit që ndajnë të njëjtat bindje.
“Kam gjetur familjen time, kam gjetur njerëzit e mi dhe jam në rregull”, ka thënë ajo.
Sarandon po merr pjesë në garën për “Luanin e Artë” në Venecia me “The Echo Chamber”, ku luan një këngëtare në moshë të thyer që punëson një producent muzike në rikuperim nga varësia ndaj drogës, për të realizuar rikthimin e saj në skenë.