Andrew Koji foli për dy dekada punë të palodhur gjatë premierës në Los Anxhelos të filmit, “Street Fighter”, duke e cilësuar rolin kryesor, atë të Ryu, si kulmin e një rrugëtimi të gjatë në industrinë e filmit.
I bazuar në serinë e njohur të videolojërave luftarake, e cila debutoi në vitin 1987, filmi sjell në ekranin e madh personazhet e tij ikonike.
Koji tha se, pavarësisht asaj që njihet si “mallkimi i adaptimeve të videolojërave”, ai fitoi besim te projekti falë skenarit të mrekullueshëm, punës fantastike të regjisorit Kitao Sakurai dhe kastit të aktorëve.
“Besoj se në fillim kisha shumë dyshime. Nuk e di kurrë se si do të përfundojnë këto projekte, pra adaptimet e videolojërave. Por mendoj se skenari ishte i mirë, toni rrëfimit ishte i duhuri dhe mënyra e përshtatjes ishte e duhura. Pastaj fillon të plotësohet kasti i aktorëve. Ke Kitaon si regjisor. Ke kompaninë ‘Legendary’ që bën punën e saj në prapaskenë, Cale Boyterin dhe gjithë ekipin përreth, të cilëve u beson. Prandaj, nuk ishte një moment i vetëm kur vendosa të jem Ryu. Ishte një proces i vazhdueshëm, duke bërë atë që bën personazhi dhe duke u përpjekur t’i qëndroja besnik. Shpresoj që ia kam dalë”, tha ai.
Koji foli gjithashtu për vitet e punës që e çuan deri te ky rol.
“Është diçka surreale, sepse jo shumë larg prej këtu, rreth 10 vjet më parë, qëndroja në disa apartamente të vogla e të tmerrshme të Los Angelesit, duke u përpjekur vazhdimisht të gjeja punë. Kam kaluar 20 vjet duke luftuar si aktor për të arritur këtu. Pra, kjo është puna e 20 viteve, jo një sukses që vjen brenda natës. Jo, kjo nuk ka qenë aspak një proces i lehtë”.
Noah Centineo, i cili interpreton rolin e Kenit në film, tha se u përgatit për gjashtë javë për xhirimet e tij, së bashku me Kojin.
“Para së gjithash, të gjithë personazhet bashkohen për të krijuar një orkestër gjigante filmike, dhe këtë orkestër e drejton Kitao Sakurai, regjisori ynë. Detyra jonë është t’i kuptojmë personazhet dhe t’u japim më shumë dimensione, duke zbuluar se çfarë mund të bëjmë me ta. Ndërsa detyra e regjisorit është të kujdeset me shumë përpikëri për mënyrën se si ata shfaqen në ekran. Sa më përket mua, pata shumë kohë për të diskutuar për Kenin dhe Ryun me regjisorin, Kitaon dhe Kojin. Para nisjes së xhirimeve, kishim gjashtë javë përgatitje. Gjatë asaj kohe, patëm mundësinë t’i shqyrtonim gjërat ngadalë. Edhe Callina ishte aty me personazhin e saj, Chun-Li, megjithëse kishim më pak skena së bashku dhe personazhet tona kanë një marrëdhënie më të kufizuar. Në thelb, filmi flet për lidhjen e fortë mes personazheve Ryu dhe Ken. Kishim gjashtë javë kohë për t’u ulur, për të biseduar dhe për të përcaktuar tonin e filmit dhe dinamikën mes tyre. Fillimisht, Keni ishte pikërisht ashtu siç e shihni në ekran: i shoqërueshëm, i ekzagjeruar në sjellje, jashtëzakonisht i sigurt në vetvete, ekstravagant dhe dikush që bën gjërat sipas mënyrës së tij, por që ia del mbanë. Mendoj se kjo është shumë e rëndësishme. Megjithatë, ky film tregon origjinën e Kenit. Prandaj, nuk do ta njihni plotësisht atë që jeni mësuar të shihni në videolojëra”, tha Centineo.
Callina Liang, e cila interpreton Chun-Lin, tha se punoi me një trajner për rreth një javë e gjysmë para fillimit të xhirimeve, për të zhvilluar mënyrën fizike të interpretimit të personazhit.
“Në fakt, punova me një trajner për rreth një javë e gjysmë para se të nisnim xhirimet, sepse unë dhe Kitao donim vërtet ta mishëronim këtë personazh krejtësisht ndryshe. Shumë nga ana e saj emocionale e gjeta brenda vetes. Por mënyra se si ajo e mban veten, si qëndron në një dhomë dhe si ecën, është ndryshe nga mënyra se si do të sillej një vajzë e zakonshme, sepse ajo është e fortë. Me shumë gjasë, mund ta mundë këdo në atë dhomë, ndërsa unë ende nuk mund ta bëj këtë! Prandaj, punova me një trajner të mrekullueshëm dhe mendoj se arrita të gjeja mënyrën fizike të interpretimit të saj dhe mënyrën se si ecën. Kostumi më ndihmoi shumë. Çdo ditë gjatë xhirimeve kisha një rutinë timen. Vendosja një bllok joge pas shpinës, shtrihesha mbi të dhe kjo më hapte kraharorin. Kështu arrija të krijoja qëndrimin dhe ecjen e saj karakteristike. Kur e bëja këtë, interpretimi më vinte natyrshëm. Ishte sikur të thosha: ‘Në rregull, tani po e mishëroj këtë personazh’”, u shpreh ajo.
Mundësi i njohur, Cody Rhodes, i cili në film interpreton Guilen, tha se shpreson të ndjekë gjurmët e yjeve të tjerë të mundjes, të cilët kanë ndërtuar karriera në film pas suksesit në këtë fushë të sportit.
Filmi “Street Fighter” shfaqet nëpër kinema nga 16 tetori.