-
Μετάφραση: Vita Abrashi-Kajtazi
- 12 Οκτωβρίου 2026 14:39
- Μοιράστε σε:
Aktorja britanike Judi Dench ka zbuluar se ka vozitur për plot 30 vjet pa patentë shoferi, derisa e kaloi testin e vozitjes në moshën 50-vjeçare.
Aktorja 91-vjeçare, e njohur edhe për rolin e saj në filmin “Skyfall”, ka treguar se për vite me radhë drejtonte një veturë sportive MG, ndonëse kishte vetëm leje të përkohshme për vozitje, e cila kërkon mbikëqyrjen e një shoferi të kualifikuar.
Në një fragment nga kujtimet e saj, të shkruara së bashku me Brendan O’Hea dhe të publikuara nga revista Οι Times, Dench ka rrëfyer se dikur ishte ndaluar nga policia pranë sheshit Parliament Square në Londër.
“E doja shumë atë veturë. Kishte çati të palosshme që nuk mbyllej, ndaj mbaja gjithmonë disa mbulesa, në rast se binte shi”, tregoi ajo.
Polici e pyeti nëse kishte patentë, ndërsa Dench iu përgjigj se kishte vetëm leje të përkohshme. Përveç drejtimit pa patentë të plotë, ajo u gjobit edhe për mungesën e shenjave identifikuese për shoferët fillestarë dhe për një dritë anësore të prishur.
Aktorja vendosi t’i shkruante gjykatës për t’u mbrojtur, duke argumentuar se shenjat ngjitëse të shoferit fillestar i kishte pasur, por ato mund të ishin shkëputur për shkak të motit.
Megjithatë, ajo u gjobit me dy funte britanike, një shumë që në atë kohë konsiderohej e konsiderueshme.
Kur bashkautori i librit i kujtoi se kishte vazhduar të voziste edhe dhjetë vjet të tjera pa patentë, Dench e korrigjoi menjëherë.
“Mos fol marrëzira. Nuk ishin dhjetë, por 30 vjet. E mora patentën kur isha 50 vjeçe. Megjithatë, unë jam shofere e mirë”, ka thënë ajo me humor.
Por bashkautori nuk ishte dakord me vlerësimin e saj dhe i kërkoi të tregonte një tjetër episod, këtë herë me bashkëshortin e saj të ndjerë, Michael Williams.
Dench kujtoi një urë të ngushtë me vetëm një korsi, ku zakonisht dy vetura nuk mund të kalonin njëkohësisht. Ajo tregoi se, teksa po i afrohej urës, vuri re një veturë që vinte nga drejtimi i kundërt.
Të dy shoferët menduan se, duke shpejtuar, mund ta kalonin urën para se të mbërrinin përballë njëri-tjetrit.
“Sapo shtypa gazin, dëgjova Mikeyn të bërtiste: ‘Jude! Jude! JUUUDE!’ Ai thjesht i mbylli sytë. Por ia dolëm. Nuk i thyem as pasqyrat anësore”, ka rrëfyer aktorja.
Dench e kujtoi këtë ngjarje me humor, duke treguar se edhe pse bashkëshorti i saj ishte tmerruar nga manovra, ata kishin arritur të kalonin urën pa dëme.