Irlanda do ta bojkotojë Eurovisionin për të dytin vit radhazi për shkak të “vrasjeve të tmerrshme” që vazhdojnë në Gaza, ka njoftuar transmetuesi kombëtar i vendit.
Irlanda është një nga pesë shtetet - së bashku me Islandën, Holandën, Spanjën dhe Slloveninë - që këtë vit refuzuan të merrnin pjesë në Garën Evropiane të Këngës, në shenjë proteste ndaj pjesëmarrjes së Izraelit.
RTÉ njoftoi se nuk do të marrë pjesë në edicionin e vitit 2027. Edhe transmetuesi holandez Avrotros njoftoi muajin e kaluar se do ta bojkotonte garën, duke e cilësuar Eurovisionin si një “platformë për përçarje”.
“RTÉ mendon se pjesëmarrja e Irlandës nuk mund të justifikohet, duke pasur parasysh humbjen e tmerrshme dhe të vazhdueshme të jetëve në Gaza dhe krizën humanitare atje, e cila vazhdon të vërë në rrezik jetën e kaq shumë civilëve”, u tha në deklaratën e transmetuesit irlandez.
Eurovisioni i vitit të ardhshëm do të mbahet në qytetin bullgar Burgas, pasi Bullgaria sivjet fitoi për herë të parë, raportoi Guardian.
Transmetuesi holandez Avrotros tha se nuk do të marrë pjesë, duke argumentuar se gara “nuk mund të konsiderohet më neutrale, për sa kohë që një shtet pjesëmarrës është ende i përfshirë në një konflikt ushtarak në shkallë të gjerë”.
Unioni Evropian i Transmetuesve (EBU), i cili organizon Eurovisionin, është në bisedime me transmetues të tjerë holandezë, me shpresën që një nga televizionet e tjera publike të vendit të marrë pjesë në garë.
Drejtori i Eurovisionit, Martin Green, ka shprehur keqardhje por theksoi se e respekton vendimin e RTÉ-së.
“Ata mbeten një pjesë e çmuar e familjes sonë dhe do të na mungojnë. Aftësia për t’i bashkuar njerëzit është në thelb të asaj që e bën këtë garë kaq të veçantë dhe është edhe më e rëndësishme tani, në një botë gjithnjë e më të vështirë dhe të përçarë”, theksoi ai.
EBU është përpjekur t’i adresojë shqetësimet e transmetuesve mbi pjesëmarrjen e Izraelit. Vitin e kaluar, reduktoi numrin e votave që mund të hynin online ose nga telefoni përmes një individi, mes pretendimeve se Izraeli kishte ndërmarrë një fushatë disproporcionale për votat e publikut.
Muajin e kaluar, EBU njoftoi se transmetuesit nuk do të mund të organizojnë garën e këngës nëse shtetet e tyre janë të përfshirë në një konflikt të armatosur ose në një situatë të ndjeshme gjeopolitike.
Eurovisioni është përballur me protesta brenda dhe jashtë ngjarjeve të garës në vitet e fundit për shkak të pjesëmarrjes së Izraelit, një garues prej vitit 1973.
Autoritetet palestineze raportojnë për mbi 73 mijë njerëz të vrarë në luftën që po e bën Izraeli në Gazë. Pavarësisht përpjekjeve për armëpushim, sulmet izraelite vazhdojnë.