Qindra shoferë kamionësh nga Ballkani organizuan të hënën një protestë të koordinuar para zyrave të Bashkimit Evropian në Sarajevë, Beograd, Podgoricë dhe Shkup, në shenjë kundërshtimi ndaj rregullave të hyrjes në BE, për të cilat thonë se po e dëmtojnë rëndë punën e tyre.
Protestuesit kërkojnë që BE-ja të heqë kufizimin prej 90 ditësh të qëndrimit në zonën Shengen për shoferët e kamionëve që vijnë nga vendet e Ballkanit Perëndimor.
Shoferët nga Serbia, Bosnje dhe Hercegovina, Mali i Zi dhe Maqedonia e Veriut thonë se lejohen të qëndrojnë vetëm për një periudhë të shkurtër në BE dhe se për këtë arsye nuk janë në gjendje të kryejnë aktivitetin e tyre, pavarësisht faktit se të katër vendet e Ballkanit varen ekonomikisht nga tregu i BE-së.
Rreth 80% e ekonomive të Ballkanit lidhen me tregtinë me Bashkimin Evropian dhe pjesa më e madhe e transportit kryhet me kamionë.
Shoferët ballkanikë të kamionëve kanë bllokuar më herët autostradat kryesore dhe pikat kufitare drejt vendeve të BE-së, si Hungaria, Kroacia dhe Greqia, duke kërkuar heqjen e kufizimit 90-ditor.
Një sistem i ri elektronik i kontrollit të hyrjeve dhe daljeve, i njohur si EES, u lansua tetorin e kaluar për të modernizuar menaxhimin e kufijve të jashtëm të BE-së.
Kjo do të thotë se rregullat ekzistuese të BE-së po zbatohen më rreptësisht, përfshirë rregullin që shtetasit e vendeve jashtë BE-së lejohen të qëndrojnë në zonën Shengen, ku mund të udhëtohet lirshëm, vetëm 90 ditë brenda një periudhe prej 180 ditësh.
Shoferët e kamionëve, të cilët kalojnë rregullisht kufirin për të kryer dërgesat, thonë se i shpenzojnë shumë shpejt 90 ditët e lejuara. Kjo do të thotë se më pas u ndalohet të drejtojnë kamionët në itineraret e tyre të zakonshme për periudha të gjata.
Ata kërkojnë një përjashtim për shoferët profesionistë, duke thënë se dhjetëra prej tyre tashmë janë ndaluar dhe dëbuar nga zona Shengen për tejkalim të afatit të lejuar të qëndrimit.