Një burrë i akuzuar për vrasjen e 16 personave në një pjesë të Brazilit i ishte shmangur kapjes duke u fshehur në pyje, kanë thënë hetuesit të cilët e arrestuan atë të hënën.
Hetuesi Douglas Garcia ka thënë se vrasësi i dyshuar Jorlan Lopes da Silva fshihej në shkurre të dendura në tenda që i improvizonte. Vrasjet për të cilat dyshohet u kryen brenda tre muajsh në rajonin e izoluar të Mulungus.
Garcia ka thënë se da Silva quhej me nofkën “mushkonja” nga vendasit për shkak të trupit të tij të imët.
“Kjo i lejoi atij t’i shmangej kapjes për vite. Jorlan jetonte kryesisht në male, prandaj ishte e vështirë të kapej dhe ta lidhnim me krimet që nuk dukej se lidheshin me të në fillim”, shtoi hetuesi.
Garcia tregoi se policia e bëri lidhjen mes tij dhe vrasjeve kur da Silva qëlloi për vdekje një 18-vjeçar në një shesh publik. Hetuesi shtoi se vrasësi serik pretendon se ka sulmuar vetëm kriminelë, por provat tregojnë ndryshe.
Da Silva u kap derisa kishte veshur një fustan të zi, një paruke dhe kishte thonjtë e lyer. Ai po mbante një foshnjë që autoritetet thanë se nuk kishte lidhje me të.