Evropa mbetet me interes jetik për Shtetet e Bashkuara, edhe pse Uashingtoni po zhvendos prioritetet e tij strategjike, ka thënë zëvendëssekretari amerikan i Mbrojtjes, Elbridge Colby, gjatë një vizite në selinë e NATO-s në Bruksel.
Colby ka shtuar se të dyja palët tashmë po zhvillojnë “një bisedë të drejtpërdrejtë dhe praktike” për mënyrën se si do të ecin përpara së bashku, ndërsa Evropa do të marrë përgjegjësinë kryesore për mbrojtjen e saj konvencionale.
“Evropa mbetet një interes kritik për Shtetet e Bashkuara, edhe pse ne u japim përparësi Hemisferës Perëndimore dhe zinxhirit të Ishujve të Parë”, ka thënë zyrtari i Pentagonit, duke shtuar se SHBA-ja mbetet e përkushtuar ndaj NATO-s dhe aleancës së saj me Evropën.
Colby ka vlerësuar përparimin në kuadër të asaj që e ka quajtur NATO 3.0, një kornizë që kërkon një rol më të madh të Evropës dhe Kanadasë brenda aleancës, dhe ka përmendur rritjen e shpenzimeve për mbrojtjen nga vende si Polonia, Gjermania dhe Holanda.
“Ne vërtet duam të theksojmë se sa i jashtëzakonshëm ka qenë ky përparim”, ka thënë ai, duke vlerësuar si presidentin Donald Trump, ashtu edhe sekretarin e përgjithshëm të NATO-s, Mark Rutte.
Rutte ndërkaq ka thënë se aleatët evropianë dhe Kanadaja kishin shpenzuar 139 miliardë dollarë më shumë për mbrojtjen në vitin 2025, krahasuar me vitet e mëparshme.
“Një Evropë më e fortë dhe një Kanada më e fortë në një NATO më të fortë, kjo po ndodh”, ka thënë ai. “Ka ende shumë për të bërë, por do t’ia dalim”, ka shtuar.
Colby ka thënë se përmes një rishqyrtimi do të rishqyrtohet qëndrimi strategjik i forcave amerikane në
Evropë dhe do të avancohet kalimi drejt një mbrojtjeje konvencionale të udhëhequr nga Evropa, ndërsa Evropa do të marrë gjithashtu drejtimin në mbështetjen për Ukrainën.