Ministria e Punëve të Jashtme e Shqipërisë në trevjetorin e sulmit terrorist në Banjskë ka bërë thirrje që përgjegjësit të dalin para drejtësisë dhe që të zbardhen të gjitha rrethanat lidhur me rastin.
Në një reagim në rrjete sociale, MPJ-ja e Shqipërisë ka thënë se pa llogaridhënie për këtë rast nuk mund të ketë normalizim të raporteve.
“Sulmi në Banjskë nuk ishte vetëm një sulm ndaj forcave policore të Kosovës. Ishte sulm kundër sundimit të ligjit, kundër paqes dhe sigurisë, si dhe kundër përpjekjeve për të ndërtuar stabilitet të qëndrueshëm dhe normalizim në rajon. Lejimi i akteve të tilla pa u ndëshkuar do të dërgonte mesazh të gabuar tek ata që synojnë të minojnë paqen përmes dhunës dhe frikësimit. Nuk mund të ketë paqe të qëndrueshme, stabilitet afatgjatë apo normalizim dhe pajtim të mirëfilltë pa llogaridhënie. Drejtësia nuk është, dhe nuk duhet të jetë kurrë, pengesë për dialogun. Përkundrazi, ajo është një nga shtyllat thelbësore mbi të cilat duhet të mbështeten dialogu i besueshëm, besimi reciprok dhe pajtimi afatgjatë”, thuhet në reagim.
Sot janë bërë tre vjet që prej kur ka ndodhur sulmi terrorist në Banjskë, në të cilin u vra polici i Kosovës, Afrim Bunjaku. E edhe pse kanë kaluar tre vjet dhe përgjegjësinë e ka marrë ish-nënkryetari i Listës Serbe, Milan Radoiçiq, ai dhe dhjetëra të akuzuar janë ende të lirë në Serbi.
