Kryeministri Albin Kurti në një takim me Princin e Kurorës së Shtetit të Kuvajtit, Sheikh Sabah Khaled Al Hamad Al-Sabah, ka kërkuar mbështetjen e këtij shteti që Kosova të fitojë statusin e vëzhguesit në Organizatën e Bashkëpunimit Islamik.
Në takimin i cili është mbajtur në margjinat e punimeve të sesionit të 81-të të Asamblesë së Përgjithshme të Kombeve të Bashkuara në New York, Kurti ka thënë se është koha që miqësinë mes dy vendeve ta kthejnë në partneritet konkret në rrugën e zhvillimit ekonomik.
“Miqësia mes Kosovës dhe Kuvajtit nuk lindi në kohë të qeta. Në vitin 1999, kur populli ynë po dëbohej dhunshëm nga shtëpitë e veta, një nismë televizive në Kuvajt mblodhi shtatë milionë dollarë për një ditë të vetme për Kosovën. Vetë Emiri i ndjerë dhuroi një milion dollarë. Kuvajti e di nga përvoja e vet ç'do të thotë të përjetosh agresionin e okupimin, ta humbasësh lirinë dhe ta rifitosh me ndihmën e aleatëve. Mbase për këtë e kuptoi Kosovën shpejt dhe mirë. Ne nuk e harrojmë këtë solidaritet”, thuhet në komunikatën e dërguar nga Kryeministria.
Bëhet gjithashtu e ditur se princi ka falënderuar shtetin e Kosovës për përkrahjen në luftimin e ekstremizmit në rajonin e Gjirit. Ndërsa biseduam edhe për kontributin e Forcës së Sigurisë së Kosovës në misionin paqeruajtës në Kuvajt si pjesë e Gardës Kombëtare të Iowa-s.
“Tani është koha për një hap të ri domethënës: këtë miqësi ta kthejmë në partneritet konkret në rrugën e zhvillimit ekonomik. Shprehëm gatishmërinë tonë për ta nënshkruar memorandumin për Komisionin e Përbashkët për Bashkëpunim, i cili do t'u japë marrëdhënieve tona mundësi të reja dhe një kornizë të qëndrueshme. U pajtuam që së shpejti do t'i përmbyllim edhe marrëveshjen për shmangien e tatimit të dyfishtë dhe marrëveshjen për mbrojtjen e investimeve. Kërkuam gjithashtu mbështetjen e Kuvajtit që Kosova të fitojë statusin e vëzhguesit në Organizatën e Bashkëpunimit Islamik”, thuhet në njoftimin e Kryeministrisë.
Tutje në komunikatë theksohet se nevoja dhe vullneti i përbashkët për bashkëpunim ekonomik më të gjerë dhe më të thellë lidhen doemos me arritjet e Kosovës në sektorë kyç, si teknologjia e informacionit dhe industria e mbrojtjes, e ku të rinjtë dhe kompanitë tona po dëshmojnë çdo ditë se Kosova është vend i talentit, i punës dhe i mundësive.