Organizatorët e protestave të përditshme pas verdiktit të Speciales, nën emrin “Jo në emrin tim” kanë bërë thirrje që të ftohet seancë e jashtëzakonshme e Kuvendit për çështjen e ndryshimeve të Ligjit për Dhomat e Specializuara.
Në një aksion para Kuvendit, organizatorët e protestave kanë thënë se pas 18 ditësh, tani kërkesat e tyre u drejtohen deputetëve.
“Sot, aksioni ynë u zhvendos para Kuvendit të Kosovës. Pas 18 ditësh protestë, kërkesa jonë tash i drejtohet Kuvendit dhe deputetëve. Ligji duhet të shqyrtohet në Kuvend. U bëjmë thirrje deputetëve që mbështesin ndryshimet të kërkojnë seancë të jashtëzakonshme, në mënyrë që propozimi për ndryshimin dhe plotësimin e Ligjit për Dhomat e Specializuara të dalë në shqyrtim dhe votim. Bashkë me ne janë fëmijë të dëshmorëve dhe të rinj nga e gjithë Kosova. Para Kuvendit vendosëm edhe banerin me qëndrimet e deputetëve ndaj projektligjit. Rregullorja e Kuvendit përcakton se një seancë e jashtëzakonshme mund të kërkohet nga 1/3 e deputetëve. THIRRENI SEANCËN. VOTOJENI LIGJIN”, ka shkruar kjo platformë në rrjete sociale.
Para Kuvendit kjo platformë shpalosi edhe një baner në të cilin ndanë deputetët pro dhe kundër UÇK-së, duke i referuar si kundër deputetët e Listës Serbe.
Një ditë më parë, Qeveria procedoi në Kuvend nismën e Partisë Demokratike për ndryshimet në Ligjin për Speciale. Qeveria dha mendimin se nuk ka pengesa ligjore për procedimin tutje të Projektligjit me të cilin i kufizohet juridiksioni lëndor, ai kohor dhe juridiksioni territorial Speciales.