Scarlett Johansson dhe Sam Rockwell iu bashkuan regjisorit Brad Bird në premierën gala të filmit të tyre të animuar, “Ray Gunn”, në Festivalin e Filmit në Londër, të cilin e organizon Instituti Britanik i Filmit.
Johansson dhe Rockwell huazojnë zërat për personazhet kryesore në këtë film, të cilin Bird e ka drejtuar dhe bashkëshkruar. Ai njihet për filmat e suksesshëm të animuar, përfshirë “The Incredibles” dhe “Ratatouille”.
Në “Ray Gunn”, Rockwell vjen në rolin e detektivit të fundit privat në një botë futuriste të populluar nga njerëz dhe alienë. Johansson e interpreton Venus Novan, një yll i njohur i muzikës pop, karriera e së cilës kërcënohet nga një skandal që mund ta vërë në rrezik edhe jetën e saj.
Për Johanssonin, puna me regjisorin Bird ishte një “përvojë unike”.
“Pasi filluam të flisnim për projektin si diçka konkrete që dëshironim ta realizonim së bashku dhe pasi u zotuam ndaj njëri-tjetrit, ai ndau me mua materialet krijuese. Sigurisht, e kisha skenarin dhe isha thjesht e emocionuar që do të punoja me Bradin, sepse jam një adhuruese e madhe e tij. Kush nuk do ta dëshironte mundësinë për të punuar përkrah tij? Ishte një përvojë shumë argëtuese dhe unike. Ishte një përvojë krijuese që nuk e kisha pasur kurrë më parë. Ai është shumë ekspresiv dhe i përfshirë në gjithçka, dhe shumicën e kohës unë interpretoj përballë tij. Çdo ditë, kur kthehesha nga puna, habitesha se sa e kënaqur dhe e lumtur ndihesha”, tha aktorja.
Johansson po ashtu tha se ishte një “adhuruese e madhe” e Birdit dhe se filmat e tij ishin tashmë një pjesë e pandashme e jetës së saj në shtëpi, falë fëmijëve.
“Kam dy fëmijë të vegjël, kështu që filmat e tij janë gjithmonë në ekran dhe i shohim vazhdimisht”.
Rockwell tregoi se u bind shpejt për t’iu bashkuar projektit, pasi Bird i tregoi disa nga ilustrimet e filmit.
“Bradi thjesht më tregoi disa ilustrime. Më tha se edhe Scarlett ishte pjesë e filmit dhe unë menjëherë e pranova punën”.
Bird i vlerësoi të dy aktorët për interpretimet e tyre, duke thënë se ata zotërojnë një aftësi të rrallë për t’i bërë emocionet e personazheve të tyre të duken spontane dhe autentike.
“Janë aktorë të jashtëzakonshëm. Të bindin se po ndiejnë dhe po bëjnë diçka për herë të parë pikërisht në momentin kur e interpretojnë, dhe kjo është një dhunti e rrallë. Sa i përket Scarlettit, ajo nuk është vetëm një aktore e mrekullueshme, por di edhe të këndojë vërtet mirë, dhe ajo këndon edhe në këtë film. Kjo është diçka e rrallë”, tha Bird.
“Ray Gunn” pritet të shfaqet në kinema të përzgjedhura më 4 dhjetor, ndërsa në platformën Netflix do të publikohet më 18 dhjetor të këtij viti.