-
Übersetzt von: Vita Abrashi-Kajtazi
- 9. September 2026 10:51 Uhr
- Teilen mit:
Aktorja e mirënjohur Penelope Cruz ka shpjeguar pse nuk ngurron të shprehë opinionet e saj politike, edhe pse kjo mund të jetë e frikshme për një figurë publike.
52-vjeçja luan në filmin triller psikologjik “Bunker”, së bashku me bashkëshortin, aktorin Javier Bardem. Duke folur në një konferencë për shtyp në Festivalin e Filmit në Venecia, Cruz ka thënë se temat e filmit lidhen ngushtë me realitetin e sotëm.
“Në këtë film ka aq shumë gjëra që lidhen me atë se ku ndodhet bota sot dhe që na prekin të gjithëve, madje edhe brezat e ardhshëm. Do të ishte vërtet kontradiktore të isha këtu dhe të thosha: ‘Oh, nuk dua të flas për këtë.’ Është e pamundur”, ka thënë ajo.
Ajo ka shtuar se të flasësh publikisht për çështje politike mund të jetë edhe më e frikshme sesa javë të tëra xhirimesh.
“Nuk mendoj se do të kishte kuptim të thosha: ‘Unë nuk flas për politikën’”, ka thënë ajo.
Bardem e mbështeti qëndrimin e Cruzit, duke thënë se çdokush ka të drejtë të shprehë atë që mendon se është e rëndësishme.
“Të gjithë kanë të drejtë të shprehin të vërtetën e tyre dhe atë që mendojnë se është e rëndësishme”, ka thënë ai.
Bardem ka theksuar gjithashtu se, si aktorë me një audiencë të madhe, ata kanë përgjegjësi edhe më të madhe për mënyrën se si flasin për botën.
Ai ka thënë se “Bunker” ngre pyetje të rëndësishme për mënyrën se si i shohim dhe i trajtojmë të tjerët, sidomos kur ndikohen nga frika dhe paragjykimet.
“Sa jemi të gatshëm ta shohim, ta ndiejmë dhe ta pranojmë tjetrin, apo ta kemi frikë bazuar në atë që imagjinojmë, në paragjykimet dhe frikat tona? Sa do të izolojmë dhe kriminalizojmë tjetrin? Nuk e di përgjigjen, por është një pyetje e mirë”, ka thënë aktori.
Cruz dhe Bardem kanë bashkëpunuar jo shpesh gjatë karrierës së tyre. Aktorja ka thënë se kjo ndihmon edhe në ruajtjen e një ekuilibri në jetën e tyre private.
“Të dy e duam shumë këtë profesion, por kemi një ekuilibër të mirë për sa i përket kohës që flasim për punën. Nëse po përgatisim një film bashkë, sigurisht që puna është pjesë e madhe e bisedave tona, por nuk e kemi bërë këtë shumë shpesh”, ka thënë ajo.