Ylli i “Game of Thrones”, Kit Harington, ka treguar lidhjen e veçantë që ka me universin e “Harry Potter”, duke zbuluar se librat audio të serisë kanë qenë një burim ngushëllimi për të pasi vendosi të hiqte dorë nga alkooli.
Aktori 39-vjeçar është konfirmuar së fundmi në rolin e magjistarit Gilderoy Lockhart në serialin e ri të HBO-së, i cili do të rikthejë në ekran historinë e “Harry Potter”.
Duke folur në podcastin “Happy Sad Confused”, Harington tha se dëgjon rregullisht versionet audio të librave të rrëfyera nga Stephen Fry.
Ai shpjegoi se mendja e tij është veçanërisht aktive gjatë natës dhe se gjithmonë e ka pasur të vështirë të flejë.
“Mendja ime nuk fiket. Kur u bëra esëll, kjo u përkeqësua veçanërisht,” tha aktori.
Sipas tij, pikërisht atëherë filloi të dëgjonte librat audio të Harry Potter dhe tani ato janë bërë pjesë e rutinës së tij të përnatshme.
“Tani janë gjëja që dëgjoj çdo natë. Prandaj kanë një vend shumë të veçantë në zemrën time,” tregoi Harington.
Harington së fundmi ka interpretuar me zë personazhin e magjistarit arrogant Gilderoy Lockhart në versionet audio të publikuara nga Audible, ndërsa ishte tashmë i entuziazmuar për idenë e serialit të ri televiziv.
Aktori tha se kur mori vesh për projektin, mendoi se ishte një ide shumë e mirë, pasi seriali mund të eksploronte historinë më gjerësisht sesa filmat.
Kur iu ofrua roli, përgjigjja e tij ishte e menjëhershme: “Po, patjetër!”
Me humor, Harington shtoi se personazhi i Lockhart nuk është aq larg personalitetit të tij.
“Ai është i varur nga vetvetja. Është thjesht një hap i vogël në të majtë timen,” tha ai me shaka.
Xhirimet për sezonin e dytë të serialit “Harry Potter”, i cili do të përqendrohet te “Dhoma e të Fshehtave”, tashmë kanë nisur.
Harington, megjithatë, është treguar shumë i rezervuar për detajet e rolit të tij dhe nuk ka dashur të zbulojë shumë rreth mënyrës se si do të paraqitet versioni i tij i Lockhart.
Ai konfirmoi se diskutimet për pamjen dhe interpretimin e personazhit janë duke u zhvilluar aktualisht.
“Do të them shumë pak për çdo gjë, sepse gjithçka është shumë sekrete. Por po, po merrem me këtë pikërisht tani,” tha ai.
Aktori, i cili e përshkruan veten si një “nerd” të Harry Potterit, është veçanërisht i emocionuar për të hyrë për herë të parë në setet ikonike të këtij universi.
Harington ka dy fëmijë të vegjël me bashkëshorten e tij, Rose Leslie, dhe tha se projekti i ri i lejon të kombinojë jetën familjare me një botë që e dashuron.
“Filmat e Harry Potterit xhirohen jo larg meje. Kështu që mund të jem baba dhe të shkoj të luaj në një botë që e dua. Sinqerisht, për momentin jam shumë i kënaqur,” tha ai.
Roli i Gilderoy Lockhart iu konfirmua Harington muajin e kaluar, pasi Nicholas Hoult, i cili ishte zgjedhur fillimisht për këtë rol, u tërhoq për shkak të problemeve me orarin.
Në filmin e vitit 2002, personazhi i Lockhart u interpretua nga Sir Kenneth Branagh.
Në një postim në Instagramin zyrtar të Harry Potter, u njoftua se Harington do të merrte rolin për sezonin e dytë.
Sipas Deadline, Hoult u largua nga projekti për shkak të “problemeve me orarin”.
Sezoni i dytë pritet të nisë xhirimet më vonë këtë vit, edhe pse sezoni i parë i serialit të HBO Max ende nuk është transmetuar dhe pritet të shfaqet gjatë Krishtlindjeve.
Në sezonin e parë të Harry Potter and the Philosopher’s Stone, rolin e Harry Potter do ta luajë Dominic McLaughlin, Alastair Stout do të jetë Ron Weasley, ndërsa Arabella Stanton do të interpretojë Hermione Granger.