-
Übersetzt von: Vita Abrashi-Kajtazi
- 19. Oktober 2026 10:20
- Teilen mit:
Nuk është e nevojshme të hiqni dorë nga karbohidratet për të rënë në peshë. Sipas dietologëve, kinoa është një zgjedhje e mirë, sepse përmban proteina bimore dhe fibra që ndihmojnë të ndiheni të ngopur për më gjatë, ka shkruar Gut essen.
Shumë njerëz që duan të dobësohen përpiqen të shmangin bukën, orizin dhe ushqimet e tjera me karbohidrate. Megjithatë, ekspertët theksojnë se rëndësi ka zgjedhja e ushqimeve të duhura dhe jo eliminimi i plotë i një grupi ushqimor.
Pse rekomandohet kinoa?
Kinoa është një ushqim i pasur me lëndë ushqyese, i cili mund të ndihmojë në kontrollin e urisë dhe menaxhimin e peshës.
Përmban proteina dhe fibra: Një filxhan me kinoa të gatuar ka rreth 8 gramë proteina, 5 gramë fibra dhe 220 kalori. Kjo përzierje mund të ndihmojë të ndiheni të ngopur për më gjatë dhe në uljen e dëshirës për të ngrënë mes vakteve.
Ndihmon në kontrollin e oreksit: Proteinat dhe fibrat ngadalësojnë tretjen dhe mund të ndihmojnë në rregullimin e oreksit.
Ofron vitamina dhe minerale: Kinoa përmban hekur, magnez, fosfor, kalium e zink.
Mund të mbështesë shëndetin e zemrës: Përbërja e saj ushqyese dhe antioksidantët mund të kontribuojnë në ushqyerje të shëndetshme.
Dietologia Samantha Cassetty e përshkruan kombinimin e proteinave dhe fibrave si një dyshe të rëndësishme për dobësimin.
“Proteinat dhe fibrat, së bashku, ju mbajnë të ngopur dhe të kënaqur, ndërsa mund të ndihmojnë edhe në rregullimin natyror të oreksit. Kinoa i përmban të dyja”, ka shpjeguar ajo.
Si mund ta përfshini kinoan në ushqimin e përditshëm?
Kinoa mund të përdoret në mënyra të ndryshme dhe nuk është e nevojshme të konsumohet vetëm në sallata.
Në mëngjes: Ziejeni me qumësht, shtoni kanellë, fruta, arra dhe fara. Mund të shtoni edhe kos të trashë për më shumë proteina.
Në sallata: Përziejeni me perime të freskëta, pulë, peshk ose bishtajore për një vakt të plotë.
Si garniturë: Përdoreni në vend të orizit, duke e shoqëruar me salmon, perime ose një burim tjetër proteinash. Për më shumë shije, shtoni hudhër, qepë, barishte dhe pak limon.
Çka tjetër ndihmon për të humbur peshë?
Sipas ekspertëve, kinoa mund të jetë pjesë e një regjimi të shëndetshëm, por asnjë ushqim i vetëm nuk garanton dobësimin. Për rezultate më të qëndrueshme, rekomandohen edhe këto zakone:
Pini mjaftueshëm ujë, pasi hidratimi ndihmon funksionimin normal të organizmit dhe mund të kontribuojë në ndjenjën e ngopjes.
Flini 7-9 orë në natë, sepse mungesa e gjumit mund të ndikojë te uria dhe zgjedhjet ushqimore.
Konsumoni më shumë perime, sidomos në drekë dhe darkë.
Zgjidhni ushqime të ndërmjetme të shëndetshme, si mollë me bajame, kos ose fruta me arra.
Lëvizni rregullisht dhe përfshini ushtrime të paktën dy herë në javë, sipas rekomandimeve të përgjithshme për aktivitetin fizik.