Fisnik Asllanis lang ersehntes Tor

Vera nuk ishte e lehtë për Fisnik Asllanin. Për kohë të gjatë u prit largimi i 24-vjeçarit nga Hoffenheimi për te ndonjë klub më i madh. U përmendën ekipe të mëdha si Barcelona e Borussia Dortmundi. Dhe në fund u vlerësua punë e kryer kalimi te RB Leipzigu.

Por asgjë nuk është e kryer pa u vënë firma. Kjo u dëshmua me rastin e Asllanit. Transferimi i tij dështoi në çastet e fundit, pasi te Leipzigu kishin një shqetësim për “gjendjen shëndetësore” të Asllanit. 

Sulmuesi u kthye te Hoffenheimi, vazhdoi stërvitjet dhe ktheu formën gradualisht. Por i mungoi goli.

Të dielën realizoi gol të bukur, pas një aksioni edhe më të bukur të Edon Zhegrovës, Leon Avdullahut e Mërgim Vojvodës, në barazimin 1:1 të Kosovës me Austrinë. 

Asllani u aktivizua në minutën e 66-të në vend të Vedat Muriqit dhe katër minuta më pas shënoi për 1:0. Për të ishte goli i parë që nga 25 prilli. Së fundi kishte realizuar në fitoren 2:1 të Hoffenheimit ndaj Hamburgut në Bundesligë. Tani për Kosovën shtatlarti i ka pesë gola në 20 paraqitje. 

Goli me Kosovën ka gëzuar edhe Hoffenheimin. Shpresohet që sulmuesi të “zhbllokohet” dhe të realizojë edhe në Bundesligë.

“Asllani shënon në duelin e Hoffenheimit”, ka shkruar klubi gjerman.

Katër lojtarë të kësaj skuadre ishin në fushë në ndeshjen Kosovë – Austri, nga dy në secilën përfaqësuese. Mungoi Albian Hajdari i lënduar, ndërsa prej më të rëndësishmëve te Kosova ishte Leon Avdullahu.

“Jam munduar të jap menjëherë energji për ekipin në fushë. Asistimi ishte perfekt dhe kam pasur vetëm ta dërgoj topin në rrjetë. Unë jam i gatshëm për të vazhduar para”, ka theksuar Asllani. 

Ai së fundi për Kosovën kishte realizuar në gjysmëfinale të plejofit, ndaj Sllovakisë, më 26 mars. Shënoi edhe ndaj Sllovenisë dhe Suedisë në kualifikimet e kaluara dhe ndaj Komoreve në miqësore.

Kohë për pushim për Asllanin nuk ka. Menjëherë të shtunën Hoffenheimi luan me Hamburgun. Është skuadra e fundit gjermane ndaj të cilës ka shënuar sulmuesi. Dhe tani shpresohet në gol tjetër të tij.