-
Übersetzt von: Blerta Haxhiu
- 28. August 2026 15:48
- Teilen mit:
Suedia do të angazhojë avionë luftarakë Gripen dhe një anije luftarake për të ndihmuar në mbikëqyrjen dhe mbrojtjen e territorit të Finlandës, të paktën deri në fund të vitit 2026.
Lajmi u bë i ditur të premten nga Forcat e Mbrojtjes së Finlandës, raporton Reuters.
Sipas ushtrisë finlandeze, pajisjet ushtarake suedeze do të forcojnë veçanërisht mbikëqyrjen e hapësirës ajrore. Kjo do t'u japë forcave finlandeze më shumë mundësi për t'u përballur me shkelje të mundshme të territorit dhe incidente të tjera.
Suedia dhe Finlanda, të dyja anëtare të NATO-s, kanë një bashkëpunim të ngushtë në fushën e mbrojtjes. Finlanda ndan një kufi prej rreth 1.340 kilometrash me Rusinë.
Ministri suedez i Mbrojtjes, Pal Jonson, tha se Suedia iu përgjigj kërkesës së Finlandës për forcimin e mbrojtjes ajrore, për shkak të përkeqësimit të situatës së sigurisë.
“Forcat e armatosura suedeze mund të ndihmojnë Finlandën, nëse është e nevojshme, për të zmbrapsur shkeljet e territorit finlandez”, tha Jonson për Reuters.
Përveç avionëve luftarakë dhe anijeve të pajisura për përballimin e dronëve, Suedia mund të dërgojë edhe sisteme tokësore kundër dronëve.
Në muajt e fundit, dronë ushtarakë që kanë hyrë në hapësirën ajrore të Finlandës, Estonisë, Letonisë dhe Lituanisë kanë rritur shqetësimet se lufta në Ukrainë mund të përhapet edhe në kufijtë veriorë të NATO-s me Rusinë.
Ndërsa Ukraina ka shtuar sulmet ndaj porteve ruse në Detin Baltik, disa dronë kanë devijuar nga objektivat e tyre dhe kanë shkaktuar paralajmërime për sigurinë në vendet fqinje.
Ndërkohë, kompania suedeze SAAB, prodhuesja e avionëve Gripen, njoftoi të premten se ka fituar një kontratë prej 1.2 miliardë koronash suedeze, rreth 126 milionë dollarë, nga Finlanda për sistemin portativ të mbrojtjes ajrore RBS 70 NG.