-
Übersetzt von: Flutura Gashi-Mehmeti
- 13. September 2026 10:18 Uhr
- Teilen mit:
Suedezët votojnë të dielën në zgjedhjet që ose do të sjellin për herë të parë në qeveri një parti të së djathtës ekstreme, ose do ta rikthejë vendin drejt liberalizmit me të cilin ka qenë prej kohësh i njohur.
Opozita e qendrës së majtë në Suedi ka një epërsi të ngushtë ndaj bllokut qeverisës të krahut të djathtë përpara zgjedhjeve parlamentare të 13 shtatorit, duke sinjalizuar një ndryshim të mundshëm të qeverisë, kanë treguar këtë javë disa sondazhe të opinionit.
Por kryeministri Ulf Kristersson, i cili ka qenë pas në sondazhet e opinionit gjatë gjithë katër vjetëve të tij në detyrë, është afruar në javët e fundit të fushatës, ndërsa rivalja Magdalena Andersson dhe socialdemokratët e saj kanë humbur terren.
Mbështetësit e bllokut të djathtë thonë se politikat e tij kanë ndihmuar në frenimin e dhunës së bandave dhe në uljen e ndjeshme të imigracionit, dhe se një fitore do të përbënte një miratim publik të kësaj qasjeje dhe të masave të tjera të ngjashme në vitet e ardhshme.
“Ne mund t’i bashkojmë partitë, votuesit dhe çështjet në një veprim të përbashkët. Prandaj ne i çojmë gjërat përpara”, u ka thënë gazetarëve në parlament këtë javë Kristersson, i cili është zotuar të përfshijë në qeveri partinë e së djathtës ekstreme, Demokratët e Suedisë, nëse blloku i tij fiton.
Kritikët kundërshtojnë se kjo agjendë po dëmton liritë civile, ndërsa po i detyron emigrantët të përshtaten më shumë me normat kulturore suedeze ose të largohen nga vendi, përmes një kombinimi masash nxitëse dhe ndëshkuese.
Qendrat e votimit në këtë shtet anëtar të BE-së me 10 milionë banorë, i cili i është bashkuar NATO-s pas pushtimit në shkallë të gjerë të Ukrainës nga Rusia, janë hapur në orën 08:00, ndërsa sondazhet në dalje të votimit pritet të publikohen menjëherë pas mbylljes së tyre në orën 18:00.
Një sukses elektoral i Demokratëve të Suedisë do të mirëpritej nga partitë e së djathtës ekstreme në rritje në Evropë, të cilat janë forcuar nga fitorja e rëndësishme këtë muaj e partisë anti-imigracion Alternative për Gjermaninë (AfD) në zgjedhjet në një land gjerman.