-
Übersetzt von: Blerta Haxhiu
- 28. August 2026 15:12
- Teilen mit:
Nepali dhe Kina po përpiqen të përballojnë pasojat e përmbytjeve shkatërruese që kanë lënë më shumë se 500 viktima dhe mbi 1.500 persona rezultojnë ende të zhdukur.
Autoritetet e menaxhimit të fatkeqësive në Nepal njoftuan se numri i viktimave ka shkuar në 538, ndërsa mbi 3.700 persona janë shpëtuar. Më vonë, policia raportoi një bilanc edhe më të lartë, prej 547 viktimash, raporton AP.
Ndërkohë, në anën kineze të kufirit ka pak informacion për të mbijetuarit. Numri i viktimave atje është rritur në pesë. Mediat shtetërore kanë publikuar pamje të evakuimit të banorëve nga fshatrat e prekura dhe të drejtuesve të vendit që po koordinojnë operacionet e ndihmës.
Më herët, mediat shtetërore kineze raportuan se 558 persona rezultonin të zhdukur.
Policia lëshoi të premten një tjetër alarm, pasi mori informacion se një digë në anën tibetiane të kufirit mund të jetë shembur. Forcat e sigurisë, ekipet e shpëtimit dhe punonjësit e ndihmës janë urdhëruar të qëndrojnë në gatishmëri të lartë dhe, nëse është e nevojshme, të zhvendosen menjëherë në zona të sigurta.
Ende nuk është e qartë nëse shembja e digës lidhet me rrezikun nga një liqen i krijuar pas përmbytjeve të para, në lartësitë e Himalajeve, në territorin kinez. Televizioni shtetëror kinez raportoi se liqeni ndodhet në një lartësi prej rreth 2.950 metrash mbi nivelin e detit.
Autoritetet nepaleze dhe kineze kishin paralajmëruar më herët për rrezikun e përmbytjeve të tjera nga ky liqen, i cili tashmë ka nisur të tejmbushet. Banorëve në zonat që mund të preken u është kërkuar të largohen drejt vendeve më të sigurta.
Zëdhënësi i policisë nepaleze, Abi Narayan Kafle, tha se operacionet e shpëtimit po vijojnë, por ekipet janë në gatishmëri të lartë.