Kryeministri spanjoll, Pedro Sanchez, ka thënë se askush nuk e parashikoi fluksin e 72,000 emigrantëve në enklavën e Ceutës, ndërsa është duke u përballur me presion në rritje mbi mënyrën se si ai e trajtoi krizën.
“Është absurde të mendosh se qeveria e dinte dhe nuk bëri asgjë”, ka thënë Sanchez në parlamentin e Spanjës të enjten, disa orë pasi dhjetëra mijëra njerëz iu bashkuan protestave në të gjithë vendin të mbështetura nga partitë e opozitës.
Sanchez gjithashtu ka thënë se nuk kishte prova që Maroku qëndronte pas kalimit masiv dhe se kishte pasur “koordinim të ngushtë” midis dy vendeve.
Një raport i policisë spanjolle ka nxjerrë në pah “tolerimin e plotë” nga ana forcave të sigurisë marokene, megjithëse zyrtarë të lartë këmbëngulin se ky fakt nuk e bën fajtor Rabatin zyrtar.
Sipas raportit, forcat marokene të sigurisë fillimisht janë vendosur në numër më të vogël se zakonisht pranë valëpritësit Tarajal që ndan enklavën nga vendi i Afrikës së Veriut, dhe nuk bënë një përpjekje serioze për të shpërndarë turmat.
Edhe pse shumica e emigrantëve janë kthyer në Marok, rreth 5,000 vazhdojnë të mbeten në rrugët dhe plazhet e Ceutës, në bregdetin e Afrikës së Veriut, prej tyre rreth 1,400 fëmijë.
Ka pasur disa raportime se zyrtarët spanjollë ishin paralajmëruar për një rritje të mbërritjeve detare përtej kufirit në Ceuta, pas një vendimi të gjykatës spanjolle që shumë emigrantë e keqkuptuan duke thënë se nuk do të shtyheshin mbrapsht nëse kalonin me not.
Sanchez ka qenë i kujdesshëm deri më tani të mos e kritikojë Marokun, por ai u ankua për deklaratat “e papranueshme” nga dy ministra marokenë në lidhje me Ceutën dhe enklavën tjetër spanjolle të Melillës. Të dy qytetet kanë kufijtë e vetëm tokësorë të BE-së në Afrikën e Veriut.