-
Übersetzt von: Flutura Gashi-Mehmeti
- 27. August 2026 14:56
- Teilen mit:
Rusia ka thënë se mund t’i kundërpërgjigjet Mbretërisë së Bashkuar për mbështetjen që i jep Ukrainës, duke goditur objektiva ushtarake brenda dhe jashtë Ukrainës.
Deklarata vjen në një kohë kur raportohet se drejtori i CIA-s, John Ratcliffe, ka paralajmëruar Kremlinin kundër sulmeve ndaj NATO-s gjatë një vizite sekrete në Moskë këtë javë.
Kryeministri britanik, Andy Burnham, ka thënë të hënën se Mbretëria e Bashkuar do t’i mundësojë Kievit zyrtar qasje në teknologji të klasifikuar për të nisur prodhimin e vet të raketave me rreze të gjatë Storm Shadow.
Por, Maria Zakharova, zëdhënësja e ministrisë së Jashtme ruse, ka thënë të enjten se Britania dhe Franca “po luajnë me zjarrin”.
Wall Street Journal ka raportuar se vizita e John Ratcliffe, drejtorit të CIA-s, në Moskë të martën, pasoi një vlerësim të inteligjencës amerikane se Rusia mund të jetë duke planifikuar ta testojë NATO-n përmes një sulmi të kufizuar ndaj një vendi aleat. Ky sulm mund të variojë nga një sulm kibernetik deri te një inkursion në shkallë të vogël, me gjasë në një vend baltik.
Rusia ka bërë kërcënime të shpeshta ndaj aleatëve perëndimorë të Ukrainës gjatë luftës, përfshirë kërcënime të tërthorta bërthamore dhe të tjera që duket se kanë pasur në shënjestër misionet diplomatike në Kiev.
I pyetur për të komentuar raportet mbi vizitën e Ratcliffe, dhe pavarësisht kërcënimit të së enjtes në mëngjes ndaj objektivave britanike, zëdhënësi i Kremlinit, Dmitry Peskov, ka thënë se “shumë materiale të tilla alarmuese po publikohen aktualisht”.
“Sigurisht, ato nuk kanë asnjë lidhje me realitetin dhe as me synimet e Federatës Ruse”, ka deklaruar ai.
Rusia besohet se po shqyrton një përshkallëzim të mëtejshëm të luftës së saj me Ukrainën, pas muajsh sulmesh gjithnjë e më të intensifikuara ukrainase ndaj infrastrukturës ruse të rafinimit të naftës dhe objekteve të tjera, të cilat po i shkaktojnë ekonomisë ruse kosto në rritje.
Kremlini ka përdorur një retorikë gjithnjë e më luftarake, pjesa më e madhe e së cilës i drejtohet audiencës së brendshme, ndërsa lufta në Ukrainë është afruar gjithnjë e më shumë me territorin rus.
Paralajmërimi i raportuar i Ratcliffe i ngjante atij të bërë nga paraardhësi i tij, William Burns, në vitin 2021, përpara pushtimit në shkallë të plotë të Ukrainës nga Rusia, një pushtim që Moska gjithashtu e mohonte se po e planifikonte.
Shqetësimet mbi synimet e Moskës janë shtuar në mes të rritjes së incidenteve të luftës hibride ruse në Evropë, të atribuuara Moskës, nga sulmet kibernetike dhe dronët, deri te zjarrvëniet në objekte që lidhen me mbështetjen e luftës së Ukrainës.
Rusia dhe SHBA-ja janë përpjekur ta minimizojnë takimin e Ratcliffe me homologët e tij rusë. Presidenti amerikan, Donald Trump e ka përshkruar vizitën të mërkurën si “pothuajse rutinore”.
Megjithatë, natyra e pazakontë e takimit ka shkaktuar spekulime të shumta në Perëndim dhe Rusi.
Vendet e NATO-s që kufizohen me Rusinë kanë ndërmarrë hapa të shpejtë për të rritur gatishmërinë e tyre ushtarake.
Polonia ka njoftuar këtë javë se kishte marrë dërgesën e parë të tankeve kryesore luftarake “Black Panther” nga Koreja e Jugut, të cilat do të dislokohen pranë kufirit me rajonin rus të Kaliningradit.