-
Übersetzt von: Blerta Haxhiu
- 19. Oktober 2026 12:36
- Teilen mit:
Rusia ka sulmuar sërish infrastrukturën energjetike të Ukrainës me raketa balistike dhe dronë, duke dëmtuar më shumë se dhjetë objekte në të gjithë vendin.
Presidenti ukrainas, Volodymyr Zelensky, tha se si pasojë e sulmeve, më shumë se gjysmë milioni njerëz mbetën pa energji elektrike, ngrohje dhe ujë.
Sipas Zelenskyt, Rusia lëshoi 16 raketa balistike drejt Kievit dhe rajonit përreth.
Autoritetet në kryeqytet njoftuan se një grua 21-vjeçare u vra nga sulmet, raporton AP.
Presidenti ukrainas theksoi se Kievi nuk mori asnjë paralajmërim paraprak nga vendet partnere për sulmin, ndonëse në të kaluarën ato i kanë ndarë me Ukrainën informacione të inteligjencës për sulmet e mundshme ruse.
Ndërkohë, Ministria ruse e Mbrojtjes deklaroi se kishte kryer një sulm masiv ndaj objektivave në Ukrainë.
Sipas Moskës, në shënjestër ishin një qendër e të dhënave, një qendër logjistike ku ruheshin pjesë për dronë dhe raketa lundruese, një objekt industrial që prodhon pjesë për dronë, si dhe një depo lokomotivash ku ruheshin raketa.
Mungesa e paralajmërimeve për sulmet e fundit po ndodh në një kohë kur Kievi po shpreh shqetësim për vendimet e fundit të Uashingtonit, të cilat mund t’i sjellin përfitime Moskës. Shtetet e Bashkuara kanë pezulluar disa sanksione ndaj Rusisë dhe kanë nënshkruar një marrëveshje për importin e naftës ruse.
Në të njëjtën kohë, kufizimet në përdorimin nga Ukraina të versionit ushtarak të shërbimit satelitor të internetit Starlink, në pronësi të kompanisë amerikane SpaceX, kanë vështirësuar operacionet ukrainase me dronë, sipas Zelenskyt.
Situatën e rëndon edhe mungesa e sistemeve amerikane të mbrojtjes ajrore Patriot, që e lë vendin më të pambrojtur ndaj raketave ruse.
Informacionet e inteligjencës të ndara nga vendet perëndimore kanë ndihmuar Ukrainën të përballojë sulmet ruse dhe të mbrohet nga raketat balistike.
Megjithatë, presidenti amerikan, Donald Trump, ka deklaruar se Uashingtoni nuk e ka ndërprerë shkëmbimin e informacioneve të inteligjencës me Kievin. Të njëjtin qëndrim e përsëriti të hënën edhe sekretari amerikan i Shtetit, Marco Rubio, i cili tha se nuk kishte informacion për sulmin rus të një nate më parë.