Qindra dronë që synonin Moskën dhe rajonin përreth saj vranë të paktën dy persona dhe dëmtuan një rafineri të madhe nafte në ditën e fundit të zgjedhjeve parlamentare të vendit, thanë autoritetet të dielën.
Kryebashkiaku i Moskës tha se më shumë se 1,600 dronë ishin interceptuar dhe rrëzuar, 450 prej të cilëve kishin në shënjestër Moskën, ka raportuar TheGuardian.
Sergei Sobyanin akuzoi Ukrainën se po përpiqej të ndërhynte në zgjedhjet treditore, të kontrolluara rreptësisht, të cilat pritet të forcojnë më tej pushtetin e presidentit Vladimir Putin, i cili ka qenë në krye të vendit për 26 vjet.
Një vullnetar shpërndan fletushka për një kandidat të partisë Rusia e Bashkuar në Moskë.
“Sulmi i paprecedentë ishte qartësisht planifikuar me qëllimin për të penguar zgjedhjet. Armiku nuk ia doli”, shkroi ai në Telegram.
Guvernatori i rajonit të Moskës ka thënë se të paktën dy persona u vranë – një grua 44-vjeçare dhe një burrë i moshuar, në dy vende të ndryshme.
Një zjarr i shkaktuar nga përplasja e një droni me një ndërtesë 21-katëshe bëri gjithashtu që rreth 400 persona të evakuoheshin, tha guvernatori i rajonit të Moskës, Andrey Vorobyov, pa specifikuar origjinën e dronëve.
Sulmet ndodhën në një kohë kur Kievi ka shtuar fushatën e sulmeve me dronë me rreze të gjatë kundër Rusisë gjatë muajve të fundit, veçanërisht ndaj infrastrukturës energjetike, me synimin për të goditur një burim të rëndësishëm të të ardhurave të Kremlinit që përdoren për financimin e luftës – e cila tashmë ka hyrë në vitin e pestë.
Sulmet ukrainase kanë nxjerrë jashtë funksionit një pjesë të konsiderueshme të kapacitetit të rafinimit të naftës në Rusi, duke shkaktuar mungesa të produkteve të naftës, rritje të çmimeve të karburanteve dhe radhë të gjata në pikat e karburantit në shumë rajone të vendit, i cili shtrihet në 11 zona kohore.
Një objekt në territorin e rafinerisë së naftës në Moskë ishte dëmtuar, tha Sobyanin. Deri atëherë nuk ishin raportuar viktima dhe shërbimet e emergjencës ndodheshin në vendngjarje.
Kjo rafineri e madhe është goditur edhe më parë nga sulme ukrainase gjatë muajve të fundit.
Ukraina nuk ka komentuar për sulmet. Të dyja palët thonë se nuk i kanë në shënjestër civilët.
Sulmi i fundit vjen pasi presidenti i SHBA-së, Donald Trump, tha të hënën se Ukraina dhe Rusia kishin rënë dakord të mos sulmonin objektet energjetike të njëra-tjetrës.
Ai gjithashtu ndodh pasi rusët nisën të votojnë të premten në zgjedhjet e para parlamentare që nga pushtimi i Ukrainës nga Moska në shkurt të vitit 2022.
Vetëm partitë që mbështesin Putinin dhe fushatën ushtarake të Kremlinit janë regjistruar për të marrë pjesë në zgjedhje. Moska ka organizuar gjithashtu votime në territoret e pushtuara të Ukrainës.
Pak rusë dyshojnë se partia Rusia e Bashkuar e Putinit do të fitojë sërish, por votimi ofron një tregues të mbështetjes publike për luftën.