-
Übersetzt von: Flutura Gashi-Mehmeti
- 23. September 2026 09:03 Uhr
- Teilen mit:
Një sërë raportesh nga Fondi i Kombeve të Bashkuara për Popullsinë (UNFPA) thonë se ka pasur rritje të ndjeshme të raportimeve për dhunë ndaj grave dhe vajzave në Rripin e Gazës, përfshirë martesat e hershme dhe martesat e detyruara.
Një nga raportet, i cili analizon të dhënat e mbledhura nga 10 organizata, thotë se kriza e zgjatur në Gazën e shkatërruar nga lufta ka “krijuar kushte në të cilat gratë dhe vajzat përballen me rreziqe gjithnjë e më të mëdha të dhunës me bazë gjinore”.
Raporti paralajmëron gjithashtu për një “përshkallëzim të rëndë” të numrit të rasteve të martesave të hershme dhe të detyruara gjatë tremujorit të dytë të këtij viti. Të dyja konsiderohen forma të dhunës me bazë gjinore (GBV) nga OKB-ja.
Një tjetër raport, i cili paraqet dëshmi nga 230 gra në kampet e mbipopulluara të personave të zhvendosur në qytetin e Gazës dhe Khan Younis, paraqet një tablo të zymtë, duke përshkruar dhunën që ato kanë përjetuar ose kanë qenë dëshmitare të saj.
Një grua e zhvendosur, e strehuar në një shkollë të kthyer në strehë në Gazë, tregon se si viktimat e përdhunimit shpesh martohen me përdhunuesit e tyre për të shmangur turpin dhe skandalin.
“Kur rastet e përdhunimit zbulohen në shkolla, të nesërmen gjen dasma dhe festime në atë shkollë”, thotë ajo.
Një tjetër grua tregon se si vitin e kaluar, në kohën e zisë së bukës, “një burrë e martoi vajzën e tij 14-vjeçare në këmbim të dy thasëve me miell, në mënyrë që ai dhe fëmijët e tij (të tjerë) të mund të hanin”.
Gjashtë gra në kampe të ndryshme të personave të zhvendosur treguan histori për shkëmbime të tilla – diçka që do të ishte e paimagjinueshme përpara fillimit të konfliktit mes Izraelit dhe Hamasit në vitin 2023.
Megjithëse mbledhja e të dhënave për të përcaktuar shifrat reale mbetet e vështirë, UNFPA thotë se në tremujorin e dytë të këtij viti numri i rasteve të raportuara të martesave të hershme dhe të detyruara ishte rritur me 123% krahasuar me tremujorin e parë. Martesat e hershme ose të fëmijëve përfshinin vajza të moshës 12 deri në 17 vjeç.
“Trendet janë tronditëse”, thotë Nestor Oëomuhangi, përfaqësuesi i UNFPA-së për Palestinën.
Ai thotë se rrethanat ekstreme të tre vjetëve të fundit, gjatë të cilave dhjetëra mijëra njerëz janë vrarë, është shkaktuar shkatërrim masiv dhe ka pasur valë të shumta zhvendosjesh në Gazë, kanë shembur strukturat shoqërore, kështu që “gjithçka është gërryer... nuk ka më sistem”.
Megjithëse tregjet ushqimore janë rihapur, shumë njerëz nuk kanë mundësi t’i blejnë produktet që ofrohen. Varfëria dhe uria mbeten në nivele ekstreme, ndërsa popullsia vazhdon të varet nga ndihmat e bamirësisë.
Pothuajse e gjithë popullsia prej më shumë se dy milionë banorësh të Gazës është dëbuar nga shtëpitë e tyre, duke bërë që shumica të jetojnë në kampe të pista me tenda ose në ndërtesa të dëmtuara.
Para luftës, vajzat në Gazë ishin më të shumta në numër dhe kishin rezultate më të mira se djemtë në çdo nivel të arsimit mbi atë fillor. Tani, për shkak të mbylljes së zgjatur të shkollave, shumë fëmijë kanë braktisur arsimin.
Për djemtë ekziston presioni për të gjetur punë informale për të ndihmuar në mbështetjen e familjeve të tyre, ndërsa për vajzat janë shtuar shqetësimet lidhur me sigurinë.
Duke jetuar mes të panjohurve, pa privatësi dhe në një shoqëri konservatore, raportohen nivele më të larta të ngacmimeve dhe abuzimeve seksuale. Shumë familje e shohin martesën e vajzave të tyre si një mënyrë për t’i mbrojtur ato dhe për të ruajtur modestinë.
Raporti i UNFPA-së, i bazuar në një studim të kryer në fund të vitit 2025 dhe në fillim të vitit 2026 – tregon se vajzat që kanë mbetur jetime gjatë luftës janë veçanërisht të cenueshme.
Një grua në një kamp në qytetin e Gazës, e intervistuar për raportin, thotë se mori pjesë në dasmën e dy vajzave nga familja e saj, përkatësisht vetëm 14 dhe 15 vjeçe.
“Xhaxhallarët e tyre i martuan kur ishin shumë të reja. A e dini pse? Sepse babai dhe nëna e tyre u martirizuan dhe xhaxhallarët donin të hiqnin qafe përgjegjësinë dhe shpenzimet”, tha gruaja.
Qendra për Çështjet e Grave në Gaza, një OJQ palestineze që punon me UNFPA-në dhe grupe të tjera mbështetëse, kanë dokumentuar raste shqetësuese të vajzave që janë martuar dhe kanë përjetuar abuzim, shpesh duke mbetur shtatzënë.
Ata thonë se vajzat në fillim të adoleshencës kanë shumë më tepër gjasa të pësojnë abort spontan dhe të lindin foshnja me peshë të ulët sesa gratë e rritura.