-
Übersetzt von: Flutura Gashi-Mehmeti
- 15. September 2026 15:56 Uhr
- Teilen mit:
Avionët luftarakë të NATO-s kanë rrëzuar një dron që kishte hyrë në hapësirën ajrore të Lituanisë gjatë natës të së hënës, kanë bërë të ditur zyrtarët e aleancës.
Njoftimi u bë një ditë pasi sekretari i përgjithshëm i NATO-s, Mark Rutte, tha se goditjet pranë territorit të aleancës do ta shtyjnë organizatën transatlantike të rrisë mbështetjen për Kievin.
Droni është rrëzuar në një fshat rreth 100 kilometra në perëndim të kryeqytetit të vendit, Vilnius, dhe pranë rezervuarit të Kaunasit, ka njoftuar të martën Qendra Kombëtare e Menaxhimit të Krizave të Lituanisë.
Ushtria lituaneze ka thënë se incidenti shënon herën e parë që një dron është rrëzuar në hapësirën ajrore të vendit.
Ndërkaq kryeministri i Lituanisë, Mindaugas Sinkevičius, ka deklaruar se veprimet tregojnë që vendi i tij duhet të shtojë mbrojtjen ajrore.
“Është e qartë se mbrojtja ajrore po bëhet një çështje gjithnjë e më e rëndësishme edhe në Lituani, jo vetëm në Ukrainë, e cila po mbron veten. Prandaj, sigurisht që do të na duhet të bëjmë përparim së bashku me forcat tona të armatosura dhe t'i bashkojmë përpjekjet tona, në mënyrë që të mund të mbrojmë hapësirën ajrore të vendit tonë”, ka deklaruar Sinkevičius
Ai ka shtuar se kishte informuar aleatët dhe partnerët mbi situatën, si brenda Bashkimit Evropian, ashtu edhe në NATO.
Kërcënimi nga dronët ka qenë vazhdimisht i pranishëm në qiellin e Lituanisë, e cila kufizohet me Bjellorusinë, një aleate e rëndësishme e Moskës, si dhe me enklavën ruse të Kaliningradit.
Ndërkohë, në një tjetër përballje mes forcave ruse dhe atyre të NATO-s të martën, ministria e Jashtme e Danimarkës ka thënë se një helikopter i forcave ajrore daneze ishte qëlluar me fishekzjarrë sinjalizues gjatë filmimit rutinor të një fregate ruse në ujërat pranë portit të Gedserit, në Detin Baltik.
Ministria e Jashtme e Danimarkës ka shkruar në X se kjo është plotësisht e papranueshme, duke shtuar se ambasadori rus ishte thirrur për të dhënë shpjegime lidhur me incidentin.
Por Rusia ka akuzuar helikopterët ushtarakë danezë për kryerjen e manovrave të rrezikshme pranë anijeve të saj luftarake në Detin Baltik dhe i ka dorëzuar një notë zyrtare Kopenhagës për t’u ankuar lidhur me incidente të tilla, ka bërë të ditur më pas ambasadori rus në Danimarkë, Vladimir Barbin, ka shkruar agjencia shtetërore ruse e lajmeve RIA.
Sulmet me dronë nga Rusia kanë vazhduar në të gjithë Ukrainën, pas një postimi të presidentit amerikan, Donald Trump, në rrjetet sociale të hënën, në të cilin ai tha se Rusia dhe Ukraina kishin rënë dakord “të mos godasin” infrastrukturën energjetike të njëra-tjetrës.
Presidenti ukrainas, Volodymyr Zelensky, ka thënë të hënën vonë se Kievi ishte “i gatshëm të mbështesë de-përshkallëzimin”, nëse Shtetet e Bashkuara mund të siguronin se “Rusia është vërtet e gatshme ta ndalë këtë luftë”.
Por Zelensky ka thënë në një deklaratë të martën se Moska kishte vazhduar të sulmonte sektorin energjetik të Ukrainës, logjistikën dhe infrastrukturën kritike, ndërsa Kievi ishte kundërpërgjigjur duke goditur një rafineri nafte në Syzran, qytet në perëndim të Rusisë.