-
Übersetzt von: Flutura Gashi-Mehmeti
- 15. September 2026 14:55 Uhr
- Teilen mit:
Konservatorët në pushtet në Gjermani kanë thirrur një takim të posaçëm për të dielën, ku pritet që drejtuesit e lartë të partisë të diskutojnë humbjet e fundit në zgjedhje dhe të shprehin mbështetje për kancelarin Friedrich Merz, i cili po përballet me vështirësi, ka thënë të martën për Reuters një burim brenda partisë.
Merzi po përballet me kritika në rritje nga brenda partisë, pas rezultatit të dobët të Kristian Demokratëve (CDU) këtë muaj në Saksoni-Anhalt, ku e djathta ekstreme, Alternativa për Gjermaninë (AfD), iu afrua sigurimit të një shumice absolute në zgjedhjet e landit.
Në nivel kombëtar, CDU-ja dhe partia e saj simotër bavareze, CSU-ja, po marrin 18% deri në 20% në sondazhe, shumë më poshtë se rezultati i tyre në zgjedhjet federale të vitit të kaluar dhe dukshëm pas AfD-së.
Besimi te kancelari është dobësuar gjithashtu brenda partisë së tij. Një sondazh i INSA-s gjatë fundjavës tregoi se shumica e mbështetësve të CDU-së nuk besojnë më se Merzi është personi i duhur për këtë detyrë, ndërsa 78% e publikut të gjerë u shprehën në të njëjtën mënyrë.
Sipas burimit, qëllimi i takimit të së dielës është koordinimi i reagimit të partisë ndaj dy votimeve të tjera që zhvillohen po atë ditë në landet Mecklenburg-Pomerania Perëndimore dhe Berlin, përcaktimi i një strategjie në kushtet e mbështetjes rekord të ulët dhe demonstrimi i unitetit pas drejtimit të Merzit.
Pas rezultatit të dobët në Saksoni-Anhalt, disa kritikë brenda CDU-së kanë thënë se një tjetër rezultat i dobët këtë fundjavë mund të shtojë presionin ndaj Merzit.
Duke folur të martën në një aktivitet me drejtues të biznesit, Merzi ka thënë se ishte i vendosur ta përfundonte mandatin e plotë katërvjeçar dhe të ndiqte reforma të tjera së bashku me partnerin e tij në koalicion, Partinë Socialdemokrate të qendrës së majtë (SPD), për të zgjidhur problemet e Gjermanisë.
“Duhet të dëshmojmë se kjo mund të arrihet me këtë koalicion”, ka thënë Merz, duke shtuar se nuk dëshironte t’i drejtohej një mocioni mosbesimi për të çuar përpara agjendën e tij.
CDU-ja aktualisht po merr 7% në sondazhe në Mecklenburg-Pomeraninë Perëndimore. Në Berlin, ajo është në krye së bashku me partinë e Majtë, me nga 20%.
Merzi ka hedhur poshtë përpjekjet për ta lidhur të ardhmen e tij politike me rezultatet e zgjedhjeve në lande të veçanta, duke argumentuar se Gjermanisë i duhet stabilitet për të çuar përpara një agjendë ambicioze reformash dhe për të përballuar sfidat evropiane, përfshirë aktet e luftës hibride dhe mbështetjen për Ukrainën.