-
Übersetzt von: Flutura Gashi-Mehmeti
- 30. August 2026 12:39
- Teilen mit:
Udhëheqësi suprem i Iranit, Mojtaba Khamenei, u ka bërë thirrje vendeve myslimane, veçanërisht atyre të Gjirit, të bashkohen kundër asaj që ai e ka quajtur “armiku i tyre i vërtetë”, duke thënë se përçarjet mes myslimanëve u shërbejnë interesave të kundërshtarëve të tyre.
Mesazhi është publikuar në llogarinë e Khameneit në Telegram me rastin e Javës së Unitetit Islamik, e cila shënon ditëlindjen e Profetit Muhamed.
Ai ka bërë thirrje për unitet dhe bashkëpunim mes myslimanëve në fusha të ndryshme, si dhe për mbrojtje të ndërsjellë, duke thënë se kushdo që krijon përçarje mes myslimanëve, “me vetëdije ose pa vetëdije”, u shërben armiqve të Islamit.
Khamenei ka pyetur nëse palestinezët do të ishin lënë “kaq të pambrojtur” nëse myslimanët do të kishin qenë të bashkuar.
Khamenei nuk është parë në publik që kur është plagosur në sulmet ajrore amerikano-izraelite gjashtë muaj më parë, të cilat nisën luftën me Iranin dhe vranë babain e tij dhe paraardhësin në postin e udhëheqësit suprem, Ajatollah Ali Khamenei.
Thirrja e tij për unitet i ngjan një deklarate që ai bëri të premten drejtuar iranianëve, kur tha se kishte ndaluar veprimet që dëmtojnë kohezionin shoqëror dhe u bëri thirrje autoriteteve të shmangin “deklaratat dekurajuese” që dobësojnë moralin kombëtar dhe atë të publikut.
Që nga Revolucioni Islamik i vitit 1979, monarkitë arabe të Gjirit e kanë parë ideologjinë revolucionare të Iranit, përfshirë retorikën e tij kundër monarkive dhe ndikimin rajonal, si një kërcënim për sistemet e tyre politike.
Gjatë konfliktit aktual, Teherani ka goditur objektiva ushtarake amerikane, si dhe infrastrukturë tjetër në shtetet e Gjirit, duke nxjerrë në pah tensionet mes Teheranit dhe fqinjëve të tij të Gjirit.
“Rekomandimi im i prerë dhe i përsëritur për sundimtarët e vendeve islamike, veçanërisht për vendet e Azisë Perëndimore dhe Gjirit, është të identifikoni armikun tuaj të vërtetë, të kuptoni planin e tij dhe të përballeni me të”, ka thënë Khamenei.