Forcat amerikane pritet të tërhiqen nga bazat e tyre të fundit në Irak deri të mërkurën, një largim që festohet si fitore nga Irani dhe aleatët e tij, të cilët tashmë gëzojnë ndikim të madh në vendin ku humbën jetën 4,500 amerikanë gjatë më shumë se dy dekadave luftë.
Ekspertët irakianë të sigurisë thonë se tërheqja, për të cilën është rënë dakord në vitin 2024 nën presidencën e Joe Bidenit dhe që është zbatuar nga administrata e Donald Trump-it, ndërkohë që ajo zhvillon luftë kundër Iranit, mund t'u japë Teheranit zyrtar dhe aleatëve të tij të fuqishëm liri të plotë, duke u mundësuar gjithashtu armiqve të tjerë të SHBA-së, përfshirë Shtetin Islamik, të rikthehen në skenë.
"Irani pritet të përfitojë në aspektin strategjik nga largimi i koalicionit, pasi kjo eliminon një prani ushtarake që për vite me radhë shërbente si kundërpeshë ndaj ndikimit të Teheranit në Irak”, ka thënë Jasim al-Bahadli, një analist irakian sigurie i specializuar në studimin e grupeve të armatosura shiite që mbështesin Iranin.
Ai ka parashikuar se milicitë pro-iraniane jo vetëm që do ta paraqisnin largimin si një fitore për lëvizjen e tyre, por edhe do të "përpiqeshin ta shfrytëzonin këtë vrull për të fituar më shumë ndikim mbi vendimmarrjen politike dhe atë të sigurisë".
Abu Mojtaba al-Yasiri, një komandant i "Rezistencës Islamike në Irak", një grupim që përfshin disa fraksione të armatosura të mbështetura nga Irani, e ka përshkruar tërheqjen amerikane si "një fitore historike për grupet e rezistencës islamike irakiane dhe irakianët e nderuar, si dhe një disfatë dërrmuese për projektin amerikan".
"Më 30 shtator, ne do të festojmë mbylljen e një kapitulli të errët në historinë e Irakut dhe dështimin e pushtimit për të imponuar vullnetin e tij mbi vendin tonë”, ka thënë ai për Reuters.
"Iraku ka dëshmuar se sovraniteti i tij nuk mund të garantohet nga forcat e huaja, por nga rezistenca dhe vullneti i popullit të tij”, ka shtuar.