Analisti politik Artan Muhaxhiri ka vlerësuar se opozita ka bërë “akt shumë të mirë” duke e lëshuar sallën e Kuvendit gjatë vazhdimit të seancës konstituive sot, pasi sipas tij, VV-ja nuk po tregon vullnet për të tejkaluar ngërçin politik.
Muhaxhiri ka thënë se kryeministri në detyrë, Albin Kurti, po tenton mungesën e kapacitetit për të krijuar marrëveshje politike ta zëvendësojë me, siç e ka quajtur ai, “shantazh dhe bullizim”.
“Është akt shumë i mirë i opozitës që e lëshuan sallën, meqë u konfirmua se VV-ja nuk e ka as vullnetin më të vogël që të sillet në mënyrë normale politike dhe ta tejkalojë këtë sfidë krejtësisht të pakuptueshme për nënkryetarët e Kuvendit, që s’ka ndodhur asnjëherë”, ka thënë Muhaxhiri në “60 Minuta” të KTV-së.
Sipas tij, kushtëzimi i votave për nënkryetarët e Kuvendit me votën për presidentin është “krejtësisht ofendues dhe absurd”.
“Ky është një tentim që mungesa e kapacitetit, dijes së Kurtit për të krijuar marrëveshje politike normale të zëvendësohet me një shantazh, bullizim: nëse ju nuk na votoni presidentin, ne nuk ua votojmë nënkryetarët. Është krejtësisht ofenduese, absurde, sepse Kurti po thotë që vota ime për nënkryetar është e barabartë me votën tuaj për president. Ku ka logjikë kjo, ku ka normalitet?”, është shprehur ai.
Muhaxhiri ka kritikuar ashpër klasën politike për zgjatjen e krizës institucionale, duke thënë se vendi përballet me probleme të shumta, ndërsa partitë politike, sipas tij, kanë humbur “sensin e respektit dhe normalitetit”.
ebenfalls
Streitigkeiten über die Vizepräsidenten unterbrechen erneut die konstituierende Sitzung.
“Një vend që ka një milion probleme, ka krizë të madhe ekonomike, ka tema të papërmbyllura, përfshirë edhe shtetësinë e plotë, kemi shumë probleme, por këtyre njerëzve, për fat të keq, u ka humbur sensi i respektit dhe normalitetit”, ka deklaruar Muhaxhiri.
Seanca konstituive edhe sot u ndërpre dhe u shty për të dielën. Ngërçi vazhdon të mbetet te nënkryetarët.