156 persona janë lënduar gjatë katër ditëve të protestave në Shqipëri, prej të cilëve 97 policë, 45 protestues dhe 12 kalimtarë. Këtë e ka bërë të ditur ministri i Brendshëm i Shqipërisë, Ervin Demo, përmes një postimi në rrjetet sociale.
Sipas Demos, në mesin e të lënduarve janë edhe katër të mitur. Ai u ka uruar shërim të shpejtë të gjithë të lënduarve, ndërsa ka dënuar përfshirjen e fëmijëve në akte dhune, duke u bërë thirrje prindërve që të mos lejojnë pjesëmarrjen e tyre në përplasjet politike.
Demo ka thënë gjithashtu se numri i studentëve në mesin e personave të arrestuar dhe të proceduar për akte të dhunshme është shumë i vogël.
Ai i ka akuzuar organizatorët e protestave për përdorimin e dhunës në funksion të përballjes politike, duke theksuar se situata e krijuar nuk duhet të cenojë rrugëtimin e Shqipërisë drejt Bashkimit Evropian.
