Botërori 2018

Januzaj: S’festoj me shqiponjë sepse s’dua të bëj veprime politike

Dy lojtarët e Zvicrës me prejardhje nga Kosova, Granit Xhaka dhe Xherdan Shaqiri, u ndëshkuan nga FIFA me gjobë për shkak të festës së tyre me simbolin kombëtar shqiponjën pas golave të shënuar në ndeshjen kundër Serbisë.

E sulmuesi belg, Adnan Januzaj, i cili po ashtu ka prejardhje nga Kosova, ndonëse ka lindur dhe është rritur në Bruksel, edhe pse shënoi gol në këtë Botëror kundër Anglisë, nuk festoi me në të njëjtën mënyrë.

Në një prononcim për AFP-në, Januzaj tha se nuk dëshiron të bëjë festime politike pas golave.

“Nuk jam shumë i përqendruar në momentin pas shënimit të golit”, tha Januzaj, raporton Koha.net.

“Është gol me plot emocione, po festoja me fansat dhe bashkëlojtarët, por mendoj se janë dy fusha – ajo e futbollit dhe ajo politike. Unë i festoj golat me bashkëlojtarët e mi”, tha Januzaj.

Januzaj tha se beson që goli i tij të jetë festuar në Kosovë. “Mendoj që po! Lojtarë tjerë shqiptarë kanë shënuar në këtë Botëror, mendoj se këto festohen gjithandej, është shumë mirë”, theksoi ai.

Adnan Januzaj, ditë më parë ka ripërsëritur deklaratën se është belg dhe se është i lumtur që luan për Belgjikën.