Botë

SHBA-ja, mospajtime me Poloninë për ligjin mbi Holokaustin

SHBA-ja shprehu sot dëshpërimin e saj pas nënshkrimit nga presidenti polak, Andrzej Duda të një ligji të kundërshtuar për Holokaustin, që minon lirinë e shtypit dhe debatin akademik.

Ky ligj, që parashikon të mbrojë Poloninë kundër atyre që i atribuojnë krimet naziste, ka provokuar tashmë irritim, në mënyrë të veçantë të Izraelit dhe SHBA-së.

Ky ligj parashikon deri në tre vjet burg për personat, përfshirë këtu dhe të huajt, që akuzojnë në kundërshtim me fakte kombin apo shtetin polak për pjesëmarrje në krimet e Gjermanisë naziste.

Presidenti Duda nënshkroi sot ligjin duke i kërkuar Gjykatës Kushtetuese për të verifikuar konformitetin me ligjin themelor. “Ne e kuptojmë që ky ligj do t’i paraqitet Gjykatës Kushtetuese polake, por SHBA-ja është e dëshpëruar nga nënshkrimi i ligjit nga presidenti polak”, deklaroi sekretari amerikan i Shtetit, Rex Tillerson në një komunikatë.