Një zyrtar vuri në dukje se sistemet e avancuara të raketave do t'u japin forcave ukrainase saktësi më të madhe në shënjestrimin e aseteve ruse brenda Ukrainës. Bideni ka thënë se raketat do t’i krijojnë avantazh Ukrainës në negociatat eventuale me përfaqësuesit e presidentit rus Vladimir Putin

Vendet perëndimore kanë premtuar më shumë armë të avancuara për të forcuar mbrojtjen e Ukrainës, ndërsa trupat po luftojnë ofensivën e madhe ruse në lindje.

Gjermania tha të mërkurën se do ta furnizojë Ukrainën me raketa moderne antiajrore dhe sisteme radari dhe SHBA-ja do të dërgojë sisteme raketash të teknologjisë së lartë dhe me rreze të mesme.

Zëdhënësi i Kremlinit u tha gazetarëve të mërkurën se SHBA-ja "po derdh benzinë mbi zjarrin".

Armatosja perëndimore, kritike për Ukrainën

Armët perëndimore janë kritike për suksesin e Ukrainës në pengimin e ushtrisë shumë më të madhe dhe të pajisur më mirë të Rusisë – duke penguar përpjekjet e saj fillestare për të marrë kryeqytetin dhe duke detyruar Moskën të zhvendosë fokusin në rajonin industrial lindor të Donbasit.

Por ndërsa lufta zvarritet dhe Rusia bombardon qytetet në përparimin e saj të shpejtë në lindje, Ukraina ka kërkuar në mënyrë të përsëritur më shumë armë. Presidenti ukrainas, Volodymyr Zelenskyy, ka kritikuar herë pas here Perëndimin për lëvizjen shumë të ngadaltë në transportin e armëve - dhe analistët ushtarakë kanë thënë se Rusia shpreson ta pushtojë Donbasin përpara se të arrijë ndonjë armë që mund të ndryshojë gjendjen në terren.

Gjermania është kritikuar veçanërisht, si brenda dhe nga aleatët jashtë vendit, se nuk po bën mjaftueshëm.

Kancelari gjerman, Olaf Scholz, u tha ligjvënësve se raketat tokë-ajër IRIS-T SLM që do të dërgojë janë sistemi më modern i mbrojtjes ajrore që ka vendi. Ato mund të operojnë në distanca më të gjata se mjetet kundërajrore të epokës së Luftës së Ftohtë që ka ofruar më parë.

"Me këtë, ne do t'i mundësojmë Ukrainës të mbrojë një qytet të tërë nga sulmet ajrore ruse”, tha ai. Sistemet e radarëve që Gjermania po dërgon do të ndihmojnë Ukrainën të shënjestrojë artilerinë e armikut.

Scholz tha se Gjermania dhe Shtetet e Bashkuara po koordinojnë lëvizjet e tyre.

Përveç sistemeve të raketave që ka premtuar, paketa e presidentit amerikan, Joe Biden, do të përfshijë helikopterë, sisteme të armëve antitank “Javelin”, automjete taktike, pjesë këmbimi dhe më shumë, thanë të martën dy zyrtarë të lartë të administratës. Zyrtarët folën në kushte anonimiteti përpara se pakoja të zyrtarizohej publikisht.

Një zyrtar vuri në dukje se sistemet e avancuara të raketave do t'u japin forcave ukrainase saktësi më të madhe në shënjestrimin e aseteve ruse brenda Ukrainës. Bideni ka thënë se raketat do t’i krijojnë avantazh Ukrainës në negociatat eventuale me përfaqësuesit e presidentit rus Vladimir Putin.

Paralajmërimi rus

Moska i sheh planet e SHBA-së si "negative", u tha gazetarëve të mërkurën zëdhënësi i Kremlinit, Dmitry Peskov, duke thënë se Kremlini nuk u beson garancive të Kievit se sistemet raketore nuk do të përdoren për të sulmuar Rusinë.

“Ne besojmë se SHBA-ja me qëllim dhe me zell po hedh benzinë ​​mbi zjarrin”, tha Peskov.

Njoftimet vijnë pasi një guvernator rajonal tha se forcat ruse tani kontrollojnë 70% të Sievierodonetskut, qytet kyç në përpjekjet e Moskës për të përfunduar marrjen e Donbasit, ku separatistët ukrainas dhe të mbështetur nga Rusia kanë luftuar për vite me radhë, dhe ku separatistët tashmë kanë pjesë të territorit nën kontroll.

Guvernatori i Luhanskut, Serhiy Haidai, tha në një postim në aplikacionin e mesazheve “Telegram” se disa trupa ukrainase janë tërhequr nga qyteti, megjithëse më vonë për Associated Press tha se trupat që mbetën po luftonin me të në rrugë.

I vetmi qytet tjetër në Luhansk që rusët nuk e kanë marrë ende, Lysychansk, është "plotësisht" nën kontrollin e Ukrainës, tha ai.

"Nëse rusët arrijnë të marrin kontrollin e plotë mbi Sievierodonetsk brenda dy deri në tri ditësh, ata do të fillojnë të instalojnë artileri dhe mortaja dhe do ta granatojnë Lysychanskun më intensivisht”, tha Haidai

Zelenskyy pranon humbjet e mëdha

Ndërkohë Zelenskyy tha se vendi po humb midis 60 dhe 100 ushtarë në ditë në luftime dhe se 500 të tjerë janë plagosur.

Ai i tha kanalit televiziv amerikan Newsmax të martën mbrëma se "situata më e vështirë është në lindje të Ukrainës dhe në jug të Donjeckut dhe Luhanskut", dy rajone që përbëjnë Donbasin.

Në Ukrainën jugore një guvernator rajonal foli me ton më pozitiv, duke thënë se trupat ruse po tërhiqen dhe po hedhin në erë ura për të parandaluar përparimin e mundshëm ukrainas. Vitaliy Kim, guvernatori i rajonit të Mykolayivit, tha se Rusia ishte vënë në mbrojtje.

"Ata kanë frikë nga një kundërsulm nga ushtria ukrainase”, shkroi Kim. Ai nuk specifikoi se ku po kryhej tërheqja. Pjesët e rajonit të Mykolayivit që janë mbajtur nga forcat ruse ditët e fundit, janë afër qytetit të madh Kherson nën kontrollin e Rusisë.

Zelenskyy tha në fjalimin e tij të natës se kishte pasur "disa suksese në drejtim të Khersonit" për Ukrainën.