Kryeministri i Britanisë së Madhe, Boris Johnson, ka deklaruar se të merresh me presidentin rus, Vladimir Putin, është njëjtë si “të mundohesh të merresh vesh me një krokodil kur ka këmbën tënde në gojë”.

Duke folur para gazetarëve në aeroplan, gjatë fluturimit për në Indi, të mërkurën, Johnsoni ka thënë se Putini mund të duket se dëshiron të negociojë, raportoi BBC-ja.

Ai paralajmëroi se lideri rus mund të kërkojë më pas të nisë një sulm të ri në kryeqytetin Kiev.

Sa i përket palës ukrainase, Johnson mendon se presidenti Zelensky do të dëshironte t’i shihte forcat ruse të dëboheshin nga Ukraina lindore.

Në çdo rast, ai tha se është në dorën e njerëzve që të vendosin për të ardhmen e tyre.

"Asgjë nuk duhet të vendoset për Ukrainën pa Ukrainën”, ka thënë Johnson.

Ministria e Jashtme e Rusisë ka marrë vendim më 16 prill që t’i ndalohet hyrja në territorin rus kryeministrit, Boris Johnson.

Përpos kryeministrit, hyrja në Rusi iu ndalua edhe sekretares së Jashtme, Lizz Truss, sekretarit të Mbrojtjes, Ben Wallace dhe dhjetë zyrtarëve të tjerë të qeverisë britanike.

Ky vendim u mor si hakmarrje për atë që Rusia e quajti “veprim i pashembullt armiqësor nga qeveria britanike”.