Policia në qytetin e New Yorkut ka arrestuar të mërkurën, një person të dyshuar për plagosjen e 10 udhëtarëve në orët e pikut, në një stacion metroje në Brooklyn, raportoi “New York Times”. Ai është akuzuar për vepër terrorizmi.

Frank James, 62 vjeç, u shpall nga policia si "person me interes" të martën, pas sulmit, duke e nisur një kërkim masiv për të.

Të mërkurën në mëngjes, zyrtarët thanë se James ishte i vetmi i dyshuar për të shtënat, në të cilat 23 persona u lënduan, 10 prej tyre nga të shtënat me armë zjarri.

Rasti riktheu në qendër të vëmendjes thirrjet për ta trajtuar dhunën në sistemin e transitit të qytetit.

Sipas policisë, i dyshuari shpërtheu dy granata tymuese dhe hapi zjarr me një pistoletë në stacionin “36th Street” të Brooklynit, të martën në mëngjes.

I dyshuari raportohet se u kap nga policia teksa po ecte në rrugët e Manhatanit.