Agjencia e rojës kufitare të Ukrainës ka njoftuar të dielën se rreth 2200 burra ukrainas të moshës luftarake janë arrestuar deri më tani derisa janë përpjekur të largohen nga vendi në kundërshtim me ligjin ushtarak.
Kjo agjenci ka thënë se disa prej tyre kanë përdorur dokumente të falsifikuara dhe të tjerë janë përpjekur të korruptojnë rojet kufitare për të dalë nga vendi.
Në njoftim është thënë gjithashtu se disa janë gjetur të vdekur derisa përpiqeshin të kalonin malet Karpate në mot të pafavorshëm, pa specifikuar numrin.
Sipas ligjit ushtarak, burrave ukrainas midis 18 dhe 60 vjeç u ndalohet të largohen nga vendi në mënyrë që të thirren për të luftuar.
Lufta në Ukrainë ka nisur më 24 shkurt, pasi trupat ruse nisën ofensivën në këtë shtet.
Presidenti rus, Vladimir Putin e ka quajtur pushtimin e Ukrainës një “mision special ushtarak” ndërsa sulmit i parapriu njohja si të pavarura e dy rajoneve separatiste në Ukrainë. /REL
-
10 prill 2022 18:01
-
Shpërndaje në: