Botë

Sekretarja amerikane: Ndalimi total i naftës ruse do t’i çojë në qiell çmimet në Evropë

Sekretarja amerikane e Thesarit, Janet Yellen, ka paralajmëruar të mërkurën se një ndalim total i naftës ruse, do të shkaktonte rritje të madhe të çmimeve të energjisë në Evropë, raporton BBC.

"Çështja me bllokimin e eksporteve të naftës nga Rusia është se shumë vende, veçanërisht në Evropë, janë shumë të varura nga ajo naftë. Dhe ne do të shohim rritje të çmimeve deri në qiell nëse vendosim një ndalim të plotë të naftës”, i ka thënë ajo një komiteti të kongresit në Washington.

Yellen ka shtuar se shpreson që kompanitë e naftës në mbarë botën të rrisin prodhimin, në mënyrë që të lejojnë sanksione të mëtejshme kundër Rusisë.

"Ne jemi dëshmitarë të cenueshmërisë që vjen nga mbështetja në një burim karburanti ose në një partner tregtar”, është shprehur Yellen.

Ajo përshkroi gjithashtu "pasojat e mëdha ekonomike në Ukrainë dhe më gjerë" që janë shkaktuar nga pushtimi, të cilat siç ka thënë, do të ndikojnë në një rritje të mprehtë globale të çmimeve të ushqimeve.