Punonjësit në Belgjikë do të mund të zgjedhin që të punojnë katër ditë në javë nga 10 orë, në vend të pesë ditëve dhe 8 orë punë, në kuadër të një sërë reformash që janë duke u bërë në tregun e punës.

Duke folur pasi qeveria e tij federale e koalicionit arriti një marrëveshje brenda natës, kryeministri Alexander De Croo ka thënë se pandemia i kishte detyruar njerëzit të punonin më fleksibël dhe të kombinonin jetën e tyre private dhe të punës.

“Kjo ka çuar në mënyra të reja të punës”, ka thënë ai në një konferencë për shtyp.

Aplikimi i reformave megjithatë mund të kërkojë muaj të tërë, pasi ligji duhet të kalojë në lexim të parë nga ana e deputetëve, para se të hyjë në fuqi.

Me këtë ligj, punonjësit në sektorin privat por edhe ata publik do të jenë të barabartë në çdo aspekt, duke filluar nga mbrojtja juridike e privilegjet e tjera.