Një muaj më vonë, më shumë shkolla kanë nisur të zbatojnë një ndalim të ngjashëm mbi hixhabet duke e detyruar gjykatën e lartë të shtetit të ndërhyjë. Tash gjykata do t’i dëgjojë peticionet e paraqitura nga studentët protestues dhe do të vendosë nëse do ta anulojë këtë ndalim

Kur nxënësve muajin e kaluar iu ndalua të hynin në klasat e tyre dhe iu tha të mos mbanin hixhab, shami që përdoret nga gratë myslimane, ata nisën të kampojnë jashtë shkollës së mesme për vajza.

Ngjarja u përhap në të gjithë internetin duke i tërhequr edhe ekipet e lajmeve në pjesën e përparme të shkollës së drejtuar nga qeveria në distriktin Udupi, në shtetin jugor indian të Karnatakas.

Vijat e betejës u tërhoqën me shpejtësi. Studentët filluan të protestojnë jashtë portës së shkollës ku u ulën të grumbulluar në grupe, duke lexuar mësimet e tyre. Stafi i shkollës, i cili thoshte se nxënësit po i kundërshtonin rregullat e uniformës, mbeti i palëkundur.

Një muaj më vonë, më shumë shkolla kanë nisur të zbatojnë një ndalim të ngjashëm mbi hixhabet duke e detyruar gjykatën e lartë të shtetit të ndërhyjë. Tash gjykata do t’i dëgjojë peticionet e paraqitura nga studentët protestues dhe do të vendosë nëse do ta anulojë këtë ndalim.

Frikë tek studentet

Ama kjo ngecje aspak e lehtë ka ngjallur frikë tek studentët myslimanë të shtetit, sipas të cilëve ata po privohen nga të drejtat e tyre fetare. Të hënën qindra prej tyre, përfshirë edhe prindërit, dolën në rrugë kundër kufizimeve, duke kërkuar që studentet të lejohen t’i ndjekin mësimet edhe kur janë me hixhab.

“Jemi dëshmitarë të një aparteidi fetar. Dekreti është diskriminues dhe prek në mënyrë dispropocionale gratë myslimane”, ka theksuar një student që ka qenë pjesë e protestave disajavore.

Deri tani disa takime mes stafit, përfaqësuesve të qeverisë dhe studentëve protestues kanë dështuar ta zgjidhin problemin. Ministri i arsimit B.C. Nagesh po ashtu ka refuzuar të heqë ndalimin. Ai ka thënë për gazetarët se “ata që nuk dëshirojnë të ndjekin kodin uniform të veshjes mund të eksplorojnë opsione të tjera”.

Për shumë gra myslimane hixhabi është pjesë e besimit të tyre islam. Ajo ka qenë për dekada burim polemikash në disa vende perëndimore, sidomos në Francë, e cila në vitin 2004 e kishte ndaluar atë të mbahej në shkollat publike. Mirëpo në Indi, ku myslimanët përbëjnë pothuajse 14% të afro 1.4 miliardë njerëzve të vendit, hixhabi nuk është as i ndaluar e as i kufizuar në vendet publike.

Diçka e zakonshme

Në fakt mbajtja e hixhabit është diçka e zakonshme në Indi dhe për shumë nga gratë simbolizon identitetin fetar dhe është thjesht çështje e zgjedhjes personale.

Për shkak se debati përfshin njëanshmëri të supozuar mbi një send fetar që mbahet për të mbuluar flokët dhe për të ruajtur modestinë, disa aktivistë të të drejtave kanë shprehur shqetësimet se dekreti rrezikon ta rrisë islamofobinë. Dhuna dhe gjuha e urrejtjes kundër myslimanëve janë shtuar nën partinë nacionaliste hindu të kryeministrit Narendra Modi, e cila qeveris shtetin Karnataka.

“Ta veçosh hixhabin për kritikë është e padrejtë dhe diskriminuese. Ata që e kundërshtojnë atë janë duke e dënuar laicizmin dhe duke e përkrahur haptazi mazhoritarizmin”, ka thënë Zakia Soman, themeluese e një grupi të grave myslimane.

Të tjerët pretendojnë së kjo nënkupton izolimin dhe margjinalizimin e mundshëm të myslimanëve që mendojnë se Modi dhe partia e tij nacionaliste hindu po i izolojnë ngadalë, duke shtuar një shqetësim tashmë në rritje nga komuniteti i pakicës në një vend multikulturor që ka garanci për lirinë fetare të sanksionuar në kushtetutën e tij.

"Ajo që ne po shohim është një përpjekje e padukshme për gratë myslimane që të largohen nga hapësirat publike," ka thënë Afreen Fatima, një studente aktiviste me bazë në Nju Delhi. Ajo tha se ndalimi është kulmi i një klime në rritje të urrejtjes kundër myslimanëve, "e cila tani është shfaqur në sferën fizike”.

“Është poshtëruese”

Protestat kanë çuar në dënimin publik, me hashtag #HijabIsOurRight që qarkullon gjerësisht në mediat sociale, por gjithashtu çoi në një reagim mjaft të papritur.

Javën e fundit disa studentë hindu në shtet kanë filluar të veshin shalle me ngjyrë shafrani, një simbol i grupeve nacionaliste. Ata gjithashtu kanë brohoritur lavdërime për perënditë e tyre, teksa protestojnë kundër zgjedhjes së mbulesës së kokës nga vajzat myslimane, duke nënkuptuar defektet fetare në rritje të Indisë dhe tensionet e hidhura midis shumicës hindu të vendit dhe pakicës së saj të madhe myslimane.

Ngjarjet kanë shtyrë qeverinë e shtetit të ndalojë veshjet për të cilat ka thënë se "ndikonin në barazinë, integritetin dhe rendin publik" kurse disa shkolla të mesme të shpallnin pushime për t’i shmangur problemet komunale.

Të hënën një nga shkollat ​​u dorëzua pjesërisht dhe lejoi studentët e saj myslimanë të ndiqnin mësimin me hixhab, por i detyroi ata të ulen në klasa të veçanta. Lëvizja u kritikua ashpër, me studentët myslimanë që pretenduan se stafi i ndante ata në bazë të besimit.

“Është poshtëruese”, ka spikatur Almas. “Sa kohë do të pranojmë që qytetarët të stigmatizohen për shkak të fesë së tyre?”

Përktheu: Blerta Haxhiu