Botë

Trazirat në Kazakistan: Trupave u është thënë të qëllojnë pa paralajmërim

Presidenti i Kazakistanit, Kassym-Jomart Tokayev, thotë se ai ka autorizuar forcat e sigurisë “të qëllojnë pa paralajmërim”, në mes të një shtypjeje të dhunshme ndaj protestave që po zhvillohet atje.

Tokayev gjithashtu njoftoi se "20,000 banditë" kishin sulmuar qytetin e Almaty, epiqendrën e protestave të shkaktuara për shkak të rritjes së çmimit të karburantit, raporton BBC. Ai ka fajësuar "terroristët" të trajnuar nga të huajt, pa dhënë prova.

Ministria e Brendshme e Kazakistanit, thotë se 26 "kriminelë të armatosur" dhe 18 oficerë sigurie janë vrarë deri më tani në këto trazira.

Në një fjalim televiziv, presidenti Tokayev tha se forcat paqeruajtëse të dërguara nga Rusia dhe shtetet fqinje kishin mbërritur me kërkesën e tij dhe janë vendosur në një bazë të përkohshme për të garantuar sigurinë.

Gjatë mëngjesit të së premtes, i pari i Kazakistanit tha se është vendosur rendi kushtetues në shumë nga rajonet e këtij vendi.

"Agjencitë e zbatimit të ligjit po punojnë shumë. Rendi kushtetues është rivendosur kryesisht në të gjitha rajonet," tha kreu i shtetit në një deklaratë, duke shtuar se operacionet për rivendosjen e rendit dhe ligjit do të vazhdojnë "derisa militantët të shkatërrohen plotësisht”, ka thënë ai.

Forca nga Organizata e Traktatit të Sigurisë Kolektive (CSTO) e udhëhequr nga Rusia thuhet se ka rreth 2,500 ushtarë. Tokayev i dha "falënderim të veçantë" presidentit rus Vladimir Putin për dërgimin e trupave.