Doza “Novavax” i bashkohet grupit të “Pfizer-BioNTech”, “Moderna”, “Johnson & Johnson” dhe “AstraZeneca” në armaturën e vaksinave të Bashkimit Evropian. BE-ja ka porositur më shumë së 100 milionë doza të vaksinës Novavax me një opsion për 100 milionë të tjerë

Rregullatori i barnave i Bashkimit Evropian i dha dritën jeshile të hënën vaksinës së pestë të COVID-19 për përdorim në bllokun prej 27 vendesh, duke i dhënë autorizim të kushtëzuar marketingut për vaksinën me dy doza të bëra nga kompania amerikane bioteknike “Novavax”.

Vendimi i Agjencisë së Barnave për të rekomanduar dhënien e autorizimit të kushtëzuar të marketingut për personat e moshës prej 18 vjeç e më lart, i cili duhet të konfirmohet nga komisioni ekzekutiv evropian, vjen pasi shumë vende evropiane po luftojnë me rritjen e infeksioneve dhe mes shqetësimeve për përhapjen e variantit të ri Omicron.

“Novavax” ka thënë se aktualisht po teston se si po qëndrojnë dozat ndaj variantit Omicron, dhe sikurse shumë prodhues të tjerë ka filluar formulimin e një versioni të përditësuar për t’u përshtatur më mirë me variantin në rast se do të jetë e nevojshme.

Dozat “Novavax” i bashkohet grupit të “Pfizer-BioNTech”, “Moderna”, “Johnson & Johnson” dhe “AstraZeneca” në armaturën e vaksinave të Bashkimit Evropian. BE-ja ka porositur më shumë së 100 milionë doza të vaksinës “Novavax” me një opsion për 100 milionë të tjerë.

Javën e kaluar, Organizata Botërore e Shëndetësisë ka dhënë miratimin urgjent për vaksinën “Novavax”, duke hapur rrugën për përfshirjen e saj në programin e mbështetur nga OKB-ja për të marrë vaksina të tilla në vendet më të varfra anembanë botës.

EMA ka treguar se komiteti i tij i barnave ka arritur në përfundimin me konsensus se “të dhënat mbi vaksinën ishin të forta dhe plotësonin kriteret e BE-së për efikasitet, siguri dhe cilësi”.

Vaksinat kundër COVID-19 e trajnojnë trupin ta njohë koronavirusin, duke e dalluar proteinën që e mbulon atë, mirëpo “Novavax” është bërë ndryshe nga shumica e vaksinave të përdorura.

Është një vaksinë proteinike, e bërë me një teknologji më të vjetër që është përdorur prej vitesh për të prodhuar lloje të tjera të vaksinës. “Novavax” me bazë në Maryland, përdor inxhinierinë gjenetike për të rritur kopje të padëmshme të proteinës se koronavirusit në qelizat e insekteve. Shkencëtarët nxjerrin dhe pastrojnë proteinën dhe më pas e përziejnë me një kimikat që e forcon sistemin imunitar.

Presidenti dhe themeluesi i “Novavax”, Stanley C. Erck , ka theksuar se nëse Komisioni Evropian e konfirmon vendimin e EMA-s, kompania “do të dorëzojë vaksinën e parë të bazuar në proteinë në BE, gjatë një kohe kritike kur ne besojmë se zgjedhja mes vaksinave do të çojë në rritjen e imunizimit”.

Verën e kaluar, “Novavax” ka raportuar një studim prej 30.000 njerëzve në Shtetet e Bashkuara dhe Meksikë, ku zbuloi se vaksina ishte e sigurt dhe 90% efektive kundër infeksionit simptomatik nga variantet e mëparshme, të ngjashme me gjetjet nga një provë prej 15.000 njerëzve në Britani. Një studim pasues ka zbuluar se një dozë përforcuese gjashtë muaj pas injektimit të fundit mund t’i nxiste antitrupat që luftojnë virusin mjaftueshëm për të trajtuar variantin delta, jashtëzakonisht ngjitës, i cili në atë kohë ishte kërcënimi më i madh.