Policia kroate ka thënë se një gazetar gjerman u ndalua dhe u gjobit për hyrjen e paligjshme në vend nga Bosnja me një grup emigrantësh.

Policia tha në një deklaratë të shtunën vonë se një gjykatë ka urdhëruar shtetasin gjerman 44-vjeçar të paguajë një gjobë prej rreth 500 euro. Burri dhe shtatë emigrantë u kapën të shtunën në Cetingrad, afër kufirit të Bosnjës, thuhet në deklaratë.

Nuk dihen menjëherë detaje të tjera për shtetasin gjerman. Policia kroate tha se ai u tha atyre se ishte një reporter.

Burri u gjobit për hyrje të paligjshme, por gjykata hodhi poshtë akuzat e policisë se shtetasi gjermani po ndihmonte emigrantët ta kalonin kufirin. Policia do të apelojë vendimin, është bërë e ditur.

Mijëra emigrantë mbeten të bllokuar në Bosnje dhe vende të tjera të Ballkanit, ndërsa kërkojnë mënyra për të arritur në Evropën Perëndimore. Emigrantët në Bosnje kërkojnë mënyra për të arritur në vendin fqinj të Bashkimit Evropian, Kroacinë, përpara se të vazhdojnë.

Kroacia është përballur me akuza të shumta për shtyrje dhe dhunë ndaj migrantëve. Zyrtarët kanë mohuar abuzimin sistematik, duke thënë se policia duhet të mbrojë kufirin nga hyrja e paligjshme.

Në grupin e emigrantëve të kapur së bashku me shtetasin gjerman ishin tre të mitur. Ata kanë kërkuar që t'u jepet azil në Kroaci, bëri të ditur policia.